މި މުބާރާތުގެ ފައިނަލް މަރުހަލާ އޮންނާނީ މިރޭ 21:30 ގައި މޮޅަދޫ ސްކޫލް ހޯލުގައެވެ. މި މުބާރާތަކީ މޮޅަދޫ ކައުންސިލުން އިސްނަގައިގެން، އަންހެނުންގެ ތަރައްގީއަށް މަސައްކަތްކުރާ ކޮމިޓީ އަދި މޮޅަދޫ ސްކޫލް ގުޅިގެން ބާއްވާ މުބާރާތެކެވެ.
މި މަހުގެ 5 ވަނަ ދުވަހު ފެށުނު ނޫރު މަދަހަ މުބާރާތުގައި 56 ދަރިވަރުން ވަނީ ބައިވެރިވެފައެވެ. މުބާރާތް ގެންގޮސްފައިވަނީ 4 އުމުރުފުރައަކަށް ބަހާލައިގެންނެވެ. ފުރަތަމަ ރައުންޑްގައި، ކޮންމެ އުމުރުފުރައަކުންވެސް އެންމެ މަތިން މާކުސް ލިބުނު 3 ބައިވެރިން ހޮވާފައިވާއިރު، ފައިނަލަށް ޖުމްލަ 12 ބައިވެރިން ވަނީ ހޮވިފައެވެ.
ފައިނަލް ރައުންޑަށް ހޮވިފައިވާ ދަރިވަރުންގެ ތެރޭގައި އަޒާން އިބްރާހިމް، އީޝާ ބިންތި ހާމިދު، ރަވާން އަހްމަދު ރައުފް، ސާރާ އަހްމަދު ޖިނާހު، މުހައްމަދު ޔޫޝައު އަހްމަދުގެ އިތުރުން ޝަމްއާ ޝާހިދު، ލޫތް އަވުދުﷲ ވަހީދު، ލާރާ ބިންތި ރިފާއު، މަރިޔަމް ޒާރާ ރަމީރު، ހައްވާ ޝިއުފާ ހުސައިން، ހަސަން ޝިޔާމް އަދި މުހައްމަދު ނިޝާމް ހިމެނެއެވެ.
މި މުބާރާތަކީ މޮޅަދޫގައި ދެވަނަ ފަހަރަށް ބޭއްވޭ މުބާރާތެކެވެ. ފުރަތަމަ މުބާރާތް ބާއްވާފައިވަނީ މިދިޔަ އަހަރުގެ ރޯދަ މަހުގައެވެ. ރަށު ކައުންސިލުން މަޢުލޫމާތު ދެއްވިގޮތުގައި، މި މުބާރާތަކީ އެ ރަށު ރައްޔިތުންގެ މެދުގައި މަގުބޫލު އަދި އެހާމެ ބޮޑު ތަރުހީބެއް އޮންނަ މުބާރާތެކެވެ.
