
ރައީސް މި ވާހަކަ ވިދާޅުވެފައިވަނީ ކޮމަންވެލްތު ދުވަހުގެ މުނާސަބަތުގައި ފޮނުއްވި މެސެޖުގައެވެ.
ރައީސް މުއިއްޒުގެ މެސެޖުގައި ވިދާޅުވެފައިވަނީ ކޮމަންވެލްތު ދުވަސް ފާހަގަކުރާ މި ދަނޑިވަޅުގައި ހަނދާންކޮށްދެނީ ކޮމަންވެލްތު އާއިލާގެ އެއްބައިވަންތަކަމުގައި ހުރި ބާރުކަމަށެވެ. އެއްބައިވަންތަކަމަކީ ހަމައެކަނި މަފްހޫމެއް ނޫންކަން ފާހަގަކުރައްވަމުން، އެއީ ދޭދޭ މެންބަރުން ހިއްސާކުރާ ގޮންޖެހުންތަކުން އަރައިގަތުމަށް ބޭނުންވާ އެއްބާރުލުން ހޯދައިދޭ ހަކަތަކަމަށް ރައީސް ބުންނެވިއެވެ.
މި އަހަރުގެ ކޮމަންވެލްތު ދުވަހުގެ ޝިއާރަކީ "ޓުގެދަރ ވީ ތްރައިވް" އެވެ. މި ޝިއާރަކީ ދިވެހި ދައުލަތުން އެއްބައިވަންތަކަމާއި، ވިލުންތެރިކަމާއި، ކުރިއެރުމަށް ދޭ އަހަންމިއްޔަތު ރަމްޒުކޮށްދޭ ޝިއާރެއްކަމަށް ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވީ، ދިވެހިރާއްޖެ ފަދަ ކުދި ދައުލަތްތަކުގެ ހައްގުގައި އަޑުއުފުލައި، މޫސުމީ ވިލުންތެރިކަމާއި، މާލީ ވަސީލަތްތަކަށް ފުރުސަތު ފަހިކުރުމާއި، އަންހެނުންނާއި ޒުވާނުން ބާރުވެރިކުރުން ފަދަ، ކުދި ދައުލަތްތަކުގެ މަސްލަހަތު ހުރި ކަންކަމުގައި ކޮމަންވެލްތުން ކުރައްވާ މަސައްކަތުގެ އަގުވަޒަންކުރައްވާ ކަމަށެވެ. ކޮމަންވެލްތު މެންބަރު ގައުމުތަކާއެކު އޮތް ގުޅުން ހަރުދަނާކުރުމަށް ރާއްޖެއިން އަބަދުވެސް ތައްޔާރަށް ތިބޭނެކަމަށްވެސް ވިދާޅުވިއެވެ.