ads
އަޒްމިރިލްދާ
އަޒްމިރަލްދާ ޖޭއެސްސީއަށް: ހުޅުވާލެވޭ އަޑުއެހުމަކަށް އެދުނު ނަމަވެސް ބަޔާން ނެގީ ސިއްރުން
ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރު އޭނާގެ ފިރިކަލުން އައިޖީއެމްއެޗުގެ ޑޮކްޓަރު އިސްމާއީލް ލަތީފް ބަންދު ނުކުރުމަށް ނުފޫޒު ފޯރުވި ކަމަށް ބުނާ މައްސަލާގައި ޖުޑީޝަލް ސަރވިސް ކޮމިޝަން (ޖޭއެސްސީ) އަށް މިއަދު ހާޒިރުކޮށްފިއެވެ.
Advertisement

ހާޒިރުކުރުމަށްފަހު ގާތްގަނޑަކަށް އެއް ގަޑިއިރުގެ ބަޔާނެއް ނަގާފައިވެއެވެ.

އަޒްމިރަލްދާ ވަނީ އޭނާގެ އަޑުއެހުންތައް ހުޅުވާލައިގެން ބޭއްވުމަށް ހުށަހަޅާފައެވެ. ނަމަވެސް ޖޭއެސްސީން އިއްޔެ ނިންމީ އަޑުއެހުން ހުޅުވާނުލައި ސިއްރުކޮށް ބޭއްވުމަށެވެ. އަޒްމިރަލްދާ ޖޭއެސްސީއަށް ހާޒިރުވެފައިވަނީ މިއަދު ހެނދުނު 10 ޖަހާއިރަށް އޭނާގެ ވަކީލު އިބްރާހިމް ޝަމީލާ އެކުގައެވެ.

މި މައްސަލާގައި ނުފޫޒު ފޯރުވި ކަމުގެ ތުހުމަތު ފަނޑިޔާރު މަހާޒު އަލީ ޒާހިރުގެ މައްޗަށްވެސް ކުރެއެވެ. މަހާޒު ޖޭއެސްސީއަށް ހާޒިރުކޮށްފައިވަނީ މިދިޔަ އާދީއްތަ ދުވަހުއެވެ. އަޒްމިރަލްދާގެ ފަރާތުން މީގެ ކުރިން ނެރުނު ބަޔާނެއްގައި ބުނެފައިވަނީ މި މައްސަލަތަކަކީ އަސްލެއް އަސާސެއް ނެތި ފަނޑިޔާރުންގެ މަސައްކަތަށް ނުފޫޒު ފޯރުވުމަށް އުފައްދާފައިވާ ހާލަތެއް ކަމަށެވެ. އަދި އޭނާއަށް އިންސާފު ހޯދުމަށް ހުރަސްއެޅެމުންދާ ކަމަށްވެސް ބުނެފައިވެއެވެ.

މީގެ އިތުރުން އަޒްމިރަލްދާ ކްރިމިނަލް ކޯޓުގެ ގާޒީންނަށް ނުފޫޒު ފޯރުވުމުގައި ކޮރަޕްޝަން ހިމެނޭ ކަމަށް ބުނާ މައްސަލައެއް އެންޓި-ކޮރަޕްޝަން ކޮމިޝަން (އޭސީސީ) އިން ވެސް ދަނީ ބަލަމުންނެވެ. އަޒްމިރަލްދާ ވަނީ އޭސީސީގެ ރައީސް އާދަމް ޝާމިލް ޝަރީއަތަށް ނުފޫޒު ފޯރުވި ކަމަށް ބުނެ މައްސަލައެއް ހުށަހަޅާފައެވެ.

މި މައްސަލައިގެ އިތުރުން ހައި ކޯޓުގެ އެސިސްޓެންޓް ރެޖިސްޓްރާ ހުސެއިން މުހައްމަދު ހަނީފް ސުޕްރީމް ކޯޓަށް ހާޒިރުކޮށް ހުސްނުއްސުއޫދު ހުތުރުބަހުން މުއާމަލާތްކުރެއްވި ތަނެއްގައި އަޒްމިރަލްދާ އާއި މަހާޒު ވެސް އިންނެވި މައްސަލައެއް ޖޭއެސްސީން ދަނީ ބަލަމުންނެވެ. މި މައްސަލަތައް ބެލެމުންދަނީ ތިން ފަނޑިޔާރުން ސަސްޕެންޑްކުރުމާ ގުޅިގެން ސުޕްރީމް ކޯޓުގައި ދުސްތޫރީ މައްސަލައެއް ބެލުން ހުއްޓިފައިވާ ދަނޑިވަޅެއްގައެވެ.

0%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް