ޕީޖީ އޮފީހުން މިއަދު ބުނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އަދަދު ނޫހުގެ ނޫސްވެރިޔާ އަދި ސީ.އީ.އޯ ހުސައިން ފިޔާޒު މޫސާއަށް ފޯނުން ގުޅުއްވައި، ބިރު ދައްކައި އިންޒާރުދީފައިވާކަމަށް ބުނެ ފުލުހުންނަށް ހުށަހެޅި މައްސަލަ ތަހުގީގުކުރުމަށް ފަހު، 23 މާރިޗު 2025 ދުވަހު ޑިއުޓީ ޕްރޮސިކިއުޝަނަށް ހުށަހަޅާފައިވާ ކަމަށެވެ.
ޕީޖީ އޮފީހުން ބުނީ މި މައްސަލާގައި ފުލުހުންގެ ހޯދާފައިވާ ހެކި ގަރީނާ ޕީޖީ އޮފީހުން ދިރާސާކޮށް ބެލިއިރު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ހުސައިން ފިޔާޒު މޫސާއަށް ގުޅައި އިންޒާރު ދިންކަމަށް ގާނޫނީ ގޮތުން މާނަކުރެވޭނެ ފަދަ ބަހެއް ނުވަތަ އިބާރާތެއް ރައީސުލްޖުމްހޫރިއްޔާ ބޭނުންކުރައްވާފައިވާކަން އެނގެން ނެތަތީ، މި މައްސަލައިގައި ދައުވާ ނުކުރުމަށް އެ އޮފީހުން ވަނީ ނިންމާފައި ކަމަށެވެ.
"އަދަދު" ނޫހުން މީގެ ކުރިން ނެރުނު ބަޔާނުގައިވާ ގޮތުގައި، ފިޔާޒަށް ގުޅުއްވައި ރައީސް އިންޒާރުދެއްވީ އެމްޑީޕީން ސަރުކާރާ ދެކޮޅަށް އޭރު ސިލްސިލާކޮށް ކުރިއަށްގެންދިޔަ މުޒާހަރާތަކުގައި އެ ޕާޓީގެ މެމްބަރަކު، ރައީސް މުއިއްޒުގެ އާއިލީ ބޭފުޅަކާ ބެހޭ ގޮތުން ވާހަކަަދައްކާފައިވާތީ އެކަމާ ކޯފާވެގެންނެވެ.
މި މައްސަލައިގައި އިންސާފުވެރި ތަހުގީގެއް ހިންގަން އެމްޓީޔޫސީގެ އިތުރުން މޯލްޑިވްސް ޖާނަލިސްޓްސް އެސޯސިއޭޝަނާއި އިންޓަނޭޝަނަލް ފެޑެރޭޝަން އޮފް ޖާނަލިސްޓްސްގެ އިތުރުން ދިވެހިރާއްޖޭގެ ބައެއް ސިޔާސީ ޕާޓީތަކުން ވަނީ ގޮވާލައިފަ އެވެ.
ފުލުހުންގެ އިތުރުން ފިޔާޒުއަށް ބިރުދެއްކި މައްސަލަ މޯލްޑިވްސް މީޑިއާ ކައުންސިލުން ވެސް ދަނީ ތަހުގީގު ކުރަމުންނެވެ. އެ މައްސަލައިގެ ތަހުގީގަށް މިދިޔަ ހޯމަ ދުވަހު ފިޔާޒު ވަނީ އެމްއެމްސީއަށް ހާޒިރު ވެސް ކޮށްފަ އެވެ. އެއަށްފަހު ރައީސް އޮފީހާ ބައްދަލު ކުރުމަށް އެމްއެމްސީން ވަނީ މިހާރު އެދިފަ އެވެ.
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވަނީ އެ މައްސަލައިގައި ހޯމް މިނިސްޓަރު އަލީ އިހުސާން މަޖިލީހަށް ހާޒިރުކުރަން އެދިވަޑައިގެންފައެވެ. އޭނާވަނީ، ފިޔާޒަށް ބިރު ދެއްކި ކަމަށް ބުނާ މައްސަލައާ ގުޅިގެން އޭނާއަށް އިތުރު ރައްކާތެރިކަން ފޯރުކޮށްދިނުމަށް ފުލުހުންގެ ފަރާތުން އަޅާފައި ވަނީ ކޮން ފިޔަވަޅެއްތޯ އައްސަވަން ހުށަހަޅުއްވައިފަ އެވެ.
