ރައީސް އަމިއްލަފުޅު ސޯޝަލް މީޑިއާގައި ކުރެއްވި ޕޯސްޓެއްގައި މޯލްޑިވްސް އެއަޕޯޓްސް ކޮމްޕެނީ ލިމިޓެޑްގެ (އެމްއޭސީއެލް) އެހާރާއި މިހާރުގެ ހުރިހާ ހިދުމަތްތެރިންނަށް ޝުކުރު ދަންނަވާފައިވެއެވެ. އަދި އުފާވެރި އަހަރަކަށާއި ދުވަހަކަށް އެމަނިކުފާނު ވަނީ އެދިވަޑައިގެންފައެވެ.
ވެލާނާ އިންޓަރނޭޝަނަލް އެއަރޕޯޓަށް 59 ވަނަ އަހަރު ފުރުމާ ގުޅިގެން މިއަދު ވަނީ ދިދަ ނެގުމުގެ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި އެއަރޕޯޓް ހިންގާ އެމްއޭސީއެލްގެ މެނޭޖްމަންޓާއި މުވައްޒަފުންގެ އިތުރުން ބައެއް ސްޓޭކްހޯލްޑަރުން ބައިވެރިވެފައިވެއެވެ. ރާއްޖޭގައި ވައިގެ ދަތުރުގެ ހިދުމަތް އެންމެ ފުރަތަމަ ފެށީ 19 އޮކްޓޯބަރު 1960 ގައި ކަމަށާއި، މައި ވައިގެ ބަނދަރު "ހުޅުލެ އެއަރޕޯޓް" ގެ ހިދުމަތް ހާއްސަ އޮފީހެއްގެ ދަށުން ދޭން ފެށީ 12 އޭޕްރީލް 1966 ގައި ކަމަށް އެމްއޭސީއެލްއިން ބުނެފައިވެއެވެ.
ވެލާނާ އިންޓަރނޭޝަނަލް އެއަރޕޯޓު ތަރައްގީކުރުމުގެ މަސައްކަތް މިހާރު ވަނީ ނިމުމަކާ ގާތްވެފައެވެ. މިހާރު ކުރިއަށްދާ އެއަރޕޯޓް ތަރައްގީކުރުމުގެ މަޝްރޫއު ނިމޭއިރު ދިވެހިންގެ ފަހުރުވެރި އެއަރޕޯޓު މުޅިން އާ އެއަރޕޯޓަކަށް ވެގެންދާނެކަމަށް ސަރުކާރުން ވަނީ ބުނެފައެވެ. އެމްއޭސީއެލް އުފައްދާފައިވަނީ 1994 ވަނަ އަހަރު އޭރު މާލެ އިންޓަނޭޝަނަލް އެއަރޕޯޓު ނަމުގައި ހިންގަމުންދިޔަ އެއަރޕޯޓުގެ ބެލެނިވެރި ފަރާތުގެ ގޮތުގައެވެ.
