އެމަނިކުފާނު މިހެން ވިދާޅުވީ ސިފައިންގެ 133 ވަނަ އަހަރޫ ދުވަސް ފާހަގަކުރުމަށް ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުންނެވެ.
ދިވެހި އަސްކަރިއްޔާގެ ބޭނުމަށް މި ސަރުކާރުން ވަނީ ބައެއް އުޅަނދުތައް ގެނެސްފައެވެ. އެގޮތުން ޑްރޯންތަކެއް މީގެ ކުރިން ގެނައިއިރު ދާދި ފަހުން ވަނީ ސިފައިންގެ ހިދުމަތަށް އަލަށް ގެނައި ޓޭންކަރުތައް ދައްކާލާފައެވެ. އަދި ތުރުކީން ހަދިޔާކުރި މިސައިލް މަނަވަރެއް އަންނަ މަހު ރާއްޖެ އަންނާނެކަމަށް ޑިފެންސް މިނިސްޓްރީން ވަނީ ބުނެފައެވެ.
މިތަކެތި ގެނައުމަށް ދިވެހި ސަރުކާރުން ކުރި ހަރަދަުތަކާއި ގުޅިގެން އެކި ފަރާތްތަކުން ދައްކާ ވާހަކަތަކަށް ރައްދުދެއްވަމުން ރައީސް މުއިއްޒު ވިދާޅުވީ ސިފައިންގެ ފެންވަރު މަތިކުރުމާއި ސިފައިންނަށް ހޯދައިދޭންޖެހޭ ތަކެތި ހޯދައިދީ ބާރުތައް ވަރުގަދަކުރުމަކީ ލަދުގަންނަން ޖެހޭ ކަމެއް ނޫންކަމަށާއި އެއީ ފަހްރުވެރިވާން ޖެހޭނެ ކަންކަން ކަމަށެވެ.
ރައީސް މުއިއްޒު ވިދާޅުވީ ސިފައިންނަށް ތަކެތި ހޯދާދިނުމުން އެކަމާއި ލަދު ގަންނަންޏާ އެމީހެއް ގައުމީ ލޯބި އޮތީ ކިހާ ހިސާބެއްގައިތޯ އަމިއްލަ ނަފްސާއި ސުވާލުކުރަން ޖެހޭކަމަށެވެ.
ސިފައިންގެ އަސްކަރިއްޔާއަށް އެންމެ ފަހުން ގެނައި އުޅަނދުތައް
ރައީސް މުއިއްޒު ވިދާޅުވީ ސިފައިންގެ ކަންކަން ރަނގަޅުކުރުމަކީ އަންނަ އޮތް ޖޯލަށް ރާއްޖޭގެ މިނިވަންކަން ގެންގޮސްދިނުމަށް ފަހްރުވެރިކަމާއި އެކު ކުރަން ޖެހޭކަމެއްކަމަށެވެ. އަދި އެކަމާ މަލާމާތްކުރާ މީހުންނަކީ ގައުމީ ލޯތްބެއް ނެތް އަމިއްލަ އެދުމާއި ސިޔާސީ ބޭނުންމަށް ކޮންމެ ކަމެއްވެސް ކޮށްފާނެ ބައެއްކަމަށް ރައީސް މުއިއްޒު ވިދާޅުވިއެވެ.
ސިފައިންގެ 133 ވަނަ އަހަރީ ދުވަހުގެ ޖަލްސާގެ ތެރެއިން
ރައީސް ވިދާޅުވީ ދިވެހި ސިފައިންގެ ހުރިހާ ބާރުތަކަށް ކުރިއެރުން ގެނެސްދިނުމުގައި ކުރާ މަސައްކަތުގައި އެ މަނިކުފާނުގެ ތަސައްވުރަކީ މާދުރު ނޫން މުސްތަގްބަލެއްގައި، ސިފައިންގެ ތެރޭގައި އެއާ ފޯސް އަކާއި ނޭވީއެއްގެ އިތުރުން އާމީއެއްވެސް އުފެއްދުން ކަމަށެވެ.
