ކޮވިޑް-19އާ ގުޅިގެން އެތައް ބަޔެއްގެ ވަޒީފާތައް ގެއްލިފައިވާ މިދަނޑިވަޅުގައި ކުލި ނުދެއްކިގެން ގެތަކުން މީހުން ނެރެ، މަގުމަތި ކުރަމުންދާ ކަމުގެ ޝަކުވާ ލިބެމުންދާކަމަށް އެޖަމިއްޔާއިން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް މިދިޔަ ހުކުރު ދުވަހު ފޮނުވި ސިޓީއެއްގައި ބުނެފައިވެ އެވެ.
މިހެން ކަންތައް ދިމާވުމުން މަގުމަތިވާ މީހުން އަސާސީ އަދި ސިއްހީ ހިދުމަތް ލިބުމުން މަހުރޫމްވެގެން ހިނގައިދާނެ ކަމަށާއި، ބަލި ފެތުރުމުގެ ބިރުވެސް އިތުރުވެދާނެކަމަށް އެސިޓީގައި ބުނެފައިވެ އެވެ.
މީގެ އިތުރުން މުޖުތަމައުގެ އިޖުތިމާއީ އަދާލަތި ގެއްލި، ދައުލަތުން އުފުލަން ޖެހޭ "ސޯޝަލް ކޯސްޓު" ވެސް އިތުރުވެގެން ދާނެ ކަމަށް އެޖަމިއްޔާއިން ދެކޭކަމަށް ބުނެފައިވެ އެވެ.
ކުލި ނުދެއްކިގެން ގެއިން ނެރެލައިފިނަމަ ސަރުކާރުން އެހީވާނެކަމަށް ކޮވިޑް-19 ގެ ޓާސްކްފޯސްގެ ތަރުޖަމާނު މަބްރޫކް އަޒީޒް ވަނީ ވިދާޅުވެފަ އެވެ. އަދި އެފަދަ ކަމެއް ދިމާވެއްޖެނަމަ ޖެންޑާ މިނިސްޓްރީގެ ހޮޓްލައިން 1412 އަށް ގުޅާ ރިޕޯޓު ކުރުމަށް ވަނީ އެދެފަ އެވެ.
މިއީ އެހެން ގައުމުތަކަށްވެސް ދިމާވެފައިވާ މައްސަލައެއްކަމާއި ބައެއް ގައުމުތަކުން މިކަމަށް ގާނޫނީ ހައްލެއް ހޯދާފައިވާކަން ޕީއައިއެލްސީ އިން ފޮނުވި ސިޓީގައި ވަނީ ފާހަގަކޮށްފަ އެވެ.
"ސަންސެޓް ގާނޫނެއް" ފާސްކޮށްގެން ނަމަވެސް މިދަނޑިވަޅުގައި މީހުން މަގުމަތި ކުރުން ގާނޫނީ ގޮތުން މަނާކޮށް، އެކަން ތަންފީޒުކުރުމަކީ މުހިންމު ކަމެއް ކަމަށް އެޖަމިއްޔާއިން ބުނެފައިވެ އެވެ. އަދި އެފަދަ ގާނޫނެއް ޑްރާފްޓެއް ކުރުމުގައި ގާނޫނީ އެހީތެރިކަން ފޯރުކޮށްދޭން ތައްޔާރަށް އޮތްކަމަށް ބުނެފައިވެ އެވެ.
ޕީއައިއެލްސީއަކީ ރާއްޖޭގައި މާލީ ފޯރުންތެރިކަން ނެތް ފަރާތްތަކަށް ހިލޭ ގާނޫނީ އެހީތެރިކަން ފޯރުކޮށްދިނުމަށް ކުރީގެ ސްޓޭޓް އެޓާނީ މަރިޔަމް ޝުނާނާ އުފައްދަވާފައިވާ ޖަމިއްޔާކެވެ.
އާއިލީ މައްސަލަތަކާއި ގުޅިގެން ގާނޫނީ އެހީ ފޯރުކޮށްދޭ ކްލިނިކެއް ކަމަށްވާ ފެމިލީ ލީގަލް ކްލިނިކުން ވެސް ވޭތުވެ ދިޔަ ހަފްތާގައި ވަނީ މިމައްސަލައަށް ހައްލެއް ހޯދައިދިނުމަށް އެދި މަޖިލީހުގެ އިންސާނީ ހައްގުތަކާއި ބެހޭ ކޮމިޓީގައި އެދިފަ އެވެ.
މިދިޔަ ހޮނިހިރު ދުވަހު އެކޮމިޓީ އިން އެމައްސަލައާ މެދު މަޝްވަރާ ކުރިނަމަވެސް ގާނޫނެއް ޑްރާފްޓް ކުރުމާމެދު ގޮތެއް ނިންމާފައެއް ނުވެ އެވެ. އެއްގަޑިއިރަށް ވުރެ ގިނައިރު މިކަމާމެދު މަޝްވަރާ ކުރުމަށްފަހު ކޮމިޓީއިން ނިންމާފައި ވަނީ ގާނޫނަކަށް ދިޔުމުގެ ކުރިން "މިއީ ކިހާ ބޮޑު މައްސަލައެއްތޯ" އަދި މި މައްސަލަ ހައްލުކުރަން ސަރުކާރުން ރާވާފައިވާ އިންތިޒާމުތަކާއި ބެހޭ މައުލޫމާތު ސާފުކުރުމަށެވެ.
މިގޮތުން ހައުސިން މިނިސްޓްރީ، މާލެ ސިޓީ ކައުންސިލް އިން މައުލޫމާތު ސާފުކުރުމަށާއި، ގާނޫނަކާއި ބެހޭގޮތުން އެޓާނީ ޖެނެރަލް އާއި މަޖިލީހުގެ ކައުންސިލަރު ޖެނެރަލް އާއި މަޝްވަރާ ކުރުމަށް އެކޮމިޓީއިން ނިންމި އެވެ. މިކަމާއި ގުޅިގެން މަޖިލީހަށް މިހާރުވަނީ ކުއްލި މައްސަލައެއް ވެސް ހުށަހަޅާފަ އެވެ.
