ޓީވީ ޕްރޮގްރާމެއްގައި ވާހަކަދައްކަވަމުން، މިނިސްޓަރު ވިދާޅުވީ ރައީސް މުއިއްޒު އީދު ފާހަގަކުރުމަށް ހާއްސަ އިސްކަމެއް ދެއްވަނީ އީދަކީ އިސްލާމީ މަތިވެރި އިހްތިފާލަކަށް ވާތީ ކަމަށެވެ.
އެހެންކަމުން އިސްލާމީ އިންތަކާއި މިންތަކުގެ ތެރޭގައި އީދުގެ އުފާ ފާޅުކޮށް، އެއްބައިވަންތަކަމާއި އުފާވެރިކަމުގެ ރޫހު ވީހާވެސް ބޮޑަކަށް އާލާކުރުމަކީ ސަރުކާރުން ވަރަށް ބޮޑަށް ތަރުހީބުދޭ ކަމެއް ކަމަށް މިނިސްޓަރު ވިދާޅުވިއެވެ. އޭގެ އިތުރުން ސަގާފީ ކުޅިވަރުތައް ކުޅޭއިރު އޭގެ ދިވެހި އަސްލު ގޮތުގައި ކުޅުމަށް މިނިސްޓްރީން ހިތްވަރުދޭ ކަމަށް މިނިސްޓަރު ފާހަގަކުރެއްވިއެވެ.
ސަރުކާރުން ގައުމީ ފެންވަރުގައި މި އަހަރުގެ ބޮޑު އީދު ތިން ރަށެއްގައި ފާހަގަކުރާނެއެވެ. އެއީ ލ.ގަމާއި ހއ.ކެލާގެ އިތުރުން ކ.ގުރައިދޫގައެވެ. އީދު ފާހަގަކުރުމާއި ގުޅޭގޮތުން މިނިސްޓަރު ފާހަގަކުރެއްވި އެހެން ކަމެއް ނަމަ، ކުލަ ޖެހުމަކީ އިހު ދިވެހިންގެ ސަގާފަތުގައި ނުހިމެނޭ ކަމެއް ކަމަށާއި، އެޒަމާނުގައި ބޮޑު އީދަކީ ފެންކުޅި ކުޅޭ އީދެއް ކަމަށެވެ.
