ބިއްލޫރި ފުޅީގައި ފެން ބަންދުކުރާ ބޮޓްލިން ޕްލާންޓުގެ މަސައްކަތަކީ، އިންޑިއާ ސަރުކާރުގެ ހައި އިމްޕެކްޓް ކޮމިނިއުޓީ ޑިވެލޮޕްމަންޓް ޕްރޮޖެކްޓުގެ ދަށުން ހޯރަފުށީ ކައުންސިލުން ހުށަހެޅި ޕްރޮޕޯޒަލް ކާމިޔާބުކޮށް، އެ ކައުންސިލާއި ފެނަކައާ ގުޅިގެން ހިންގުމަށް އެއްބަސްވެފައިވާ މަޝްރޫއެކެވެ.
އެމްޑީޕީން މިރޭ ނެރުނު ބަޔާނެއްގައި ބުނީ ބިއްލޫރި ފުޅީގައި ފެން ބަންދު ކުރުމަށް ހޯރަފުށީގައި އެޅި ބޮޓްލިން ޕްލާންޓުގެ މަސައްކަތް ކުރަމުންދިޔަ ގިނަ އަދަދެއްގެ މުވައްޒަފުން ވަޒީފާއިން ވަކިކުރުން އެ ޕާޓީން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ.
އިގުތިސާދީ ނަފާ ހޯދުމަށް ކައުންސިލުތަކުން ކުރަމުން ގެންދާ މިފަދަ މަސައްކަތްތަކަށް ހުރަސްއެޅުން ހުއްޓާލައި، ސަރުކާރުން ސިޔާސީ ބޭނުމުގައި ޕްރޮޖެކްޓުތައް ހުއްޓުވުމުން އެތައް އާއިލާއެއް ހާލުގައި ޖެހެމުންދާނެ ކަމަށް އެމްޑީޕީން ބުންޏެވެ.
އެ ޕާޓީން ފެނަކައަށް ގޮވައިލީ، ހޯރަފުށީ ބޮޓްލިން ޕްލާންޓުގެ މަސައްކަތް ހުއްޓައިނުލުމަށާއި، ވަކިކުރި މުވައްޒަފުންގެ ވަޒީފާތައް އަލުން އިއާދަކޮށްދިނުމަށެވެ.
ހދ. ކުޅުދުއްފުށީގައި ކަރަންޓުގެ ހިދުމަތް ފޯރުކޮށްދިނުމަށް ސިޓީ ކައުންސިލާއެކު އެއްބަސްވުމެއް ގާއިމުކުރުމަށް ފެނަކައިން ދެކޮޅު ހަދާތީވެ އެ ކައުންސިލުން ވެސް ވަނީ ފެނަކައާ ދެކޮޅަށް ދައުވާކޮށް ޝަރީއަތަށް ހުށަހަޅަން ނިންމައިފަ އެވެ.
މި މައްސަލަ އާއި ގުޅޭ ގޮތުން ހޯރަފުށީ ކައުންސިލުން ނެރެފައިވާ ބަޔާނުގައި ބުނެފައިވަނީ، އިންޑިއާ ސަރުކާރުގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްގެ ދަށުން ހޯރަފުށީ ކައުންސިލުން ހުށަހެޅި ޕްރޮޕޯސަލް ކާމިޔާބުކޮށް، ބޮޓްލިންގް ޕްލާންޓުގެ މަސައްކަތް ޖޮއިންޓް ވެންޗަރ އުސޫލުން ގާއިމްކޮށް ހިންގުމަށް ހޯރަފުށީ ކައުންސިލާއި ފެނަކައާއި ދެމެދު ފަހުމުނާމާ އެއް އެކުލަވާލާފައިވާ ކަމަށެވެ.
