މި އަހަރު ފާހަގަކުރާނީ ރާއްޖޭގެ 60 ވަނަ މިނިވަން ދުވަހެވެ. މި ދުވަސް ފާހަގަކުރަން ކުލަގަދަ ހަރަކާތްތަކެއް ކުރިއަށްގެންދިއުމަށް ނިންމާފައިވާކަމަށް މިނިސްޓްރީން ބުނެއެވެ.
އެގޮތުން މިއަހަރުވެސް މިނިވަން ދުވަހާއި ގުޅިގެން ބާއްވާ ކުޅިވަރު ހަރަކާތާއި ޤައުމީ ދިފާއީ ބާރުގެ އަސްކަރީ ހިނގާލުމުގެ އިތުރުން ފުޅަނދުބުރެއްވެސް އޮންނާނެކަމަށް މިނިސްޓްރީން ބުނެއެވެ.
މި އަހަރަކީ ދިވެހިރާއްޖޭގެ މިނިވަންކަމަށް 60 އަހަރު ފުރޭ އަހަރު ކަމުގައިވާތީ މި އަހަރު އާންމުކޮށް ބޭނުންކުރާނެ ލޯގޯއެއް ފަރުމާ ކުރުމަށް މިނިސްޓްރީން މިހާރުވެސް ވަނީ ހުޅުވާލާފައެވެ. ލޯގޯ ކުރަހަން ބޭނުންވާ ފަރާތްތަކަށް އެ ފުރުސަތު މާދަމާގެ ނިޔަލަށް މިނިސްޓްރީން ވަނީ ހުޅުވާލާފައެވެ.
ހުށަހަޅާ ލޯގޯތަކުގެ ތެރެއިން އެންމެ މޮޅު ލޯގޯއެއް ކަނޑައަޅާނީ ފަނޑިޔާރުންގެ ޕެނަލަކުން ކަމަށް މިނިސްޓްރީން ބުނެއެވެ. އަދި އެއްވަނައަށް ހޮވޭ ލޯގޯ ފަރުމާ ކުރާ ފަރާތަކަށް 30،000 ރުފިޔާގެ ފައިސާގެ އިނާމެއްވެސް ވަނީ ހުށަހަޅާފައެވެ.
މިނިސްޓްރީން އާއްމުކޮށްފައިވާ އުސޫލުގައިވާ ގޮތުން، ލޯގޯ ފަރުމާ ކުރުމުގައި ބަލަން ޖެހޭ ކަންކަމުގެ ތެރޭގައި ދިވެހި ދައުލަތުގެ އެވޭލޭކަމާއި މިނިވަންކަމުގެ 60 އަހަރު ރަމްޒުކޮށްދިނުން ފަދަ ކަންކަން ހިމެނެ އެވެ.
