މި ކައުންޓްޑައުން ފަށައިދެއްވީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި އެމްޑީ އިބްރާހިމް ޝަރީފު މުހައްމަދެވެ.
މިއީ ރާއްޖޭގެ ޓޫރިޒަމް އަދި އިގްތިސާދަށް އާ ދައުރެއް ފެށުމުގެ ގައުމީ މުހިންމު ހިނގުމެއްކަމަށް އެމްއޭސީއެލް އިން ބުންޏެވެ. ކައުންޓްޑައުން ރަސްމީކޮށް ފެށުމުގެ ހަފްލާގައި އެމްއޭސީއެލްގެ އިސް ބޭފުޅުން ބައިވެރިވެ ވަޑައިގެންނެވިއެވެ. މި ހަފްލާގައި ހާމަކުރެވުނު ގޮތުގައި ޓާމިނަލް ހުޅުވުމަށް މިހާރު ވަނީ 35 ދުވަސް ބާކީ އޮތްކަން ފާހަގަކޮށްފައިވެއެވެ.
އާ ޕެސެންޖާ ޓާމިނަލަކީ ރާއްޖޭގެ މައި ވައިގެ ބަނދަރު ތަރައްގީކުރުމުގެ މަޝްރޫއުގެ މުހިންމު ބައެއްކަމަށް ވެފައި، މިއީ ރާއްޖޭގެ ޓޫރިޒަމް ސިނާއަތަށް އިތުރު ކުރިއެރުމެއް ގެނެސްދޭނެ ކަމެއްގެ ގޮތުގައި ފާހަގަކުރެވެއެވެ. ރާއްޖެއަށް ޒިޔާރަތްކުރާ ޓޫރިސްޓުންގެ އަދަދު އިތުރުވަމުން އަންނައިރު، އާ ޓާމިނަލްއިން އެއަރޕޯޓުގެ ހިދުމަތްތައް ފުޅާކޮށް، ގިނަ މީހުންނަށް ހިދުމަތް ދެވޭނެ ކަމަށް ބެލެވެއެވެ.
