މަސައްކަތްތެރިންނަށް އެންމެ ކުޑަކޮށް ދޭންޖެހޭ އުޖޫރަ ނުވަތަ މިނިމަމް ވޭޖް ރިވިއު ކުރުމުގެ މަސައްކަތް އަންނަ ޑިސެމްބަރު މަހުގެ ނިޔަލަށް ނިންމައިލެވޭނެ ކަމަށް ލޭބާ މިނިސްޓަރު ޑރ. އަލީ ހައިދަރު މިއަދު ވިދާޅުވެއްޖެއެވެ.
Advertisement
2021 ވަނަ އަހަރު އެކުލަވާލި މިނިވަންވޭޖް ގާނޫނު ބުނާގޮތުން ކޮންމެ ދެ އަހަރަކުން އެއް އަހަރު އެ އަދަދު ރިވިއުކުރަންޖެހެއެވެ. އެހެންނަމަވެސް 2023 ވަނަ އަހަރުގެ ނޮވްމެބަރަށް މިހާރު ދޭ މިނިވަން ވޭޖް ރިވިއުކުރަން ޖެހުނު ނަމަވެސް މިހާތަނަށް ރިވިއުކޮށްފައެއްނުއެވެ.
ރައްޔިތުން މަޖިލީހުގެ މެމްބަރަކު ކުރެއްވި ސުވާލަކަށް ޖަބާބު ދެއްވަމުން މިނިސްޓަރު ހައިދަރު ވިދާޅުވީ މިނިވަން ވޭޖް ރިވިއުގެ މަސައްކަތް ނިމިފައި ނުވަނީ މިދިޔަ ސަރުކާރުން އެ މަސައްކަތްކޮށްފައިނުވާތީ ކަމަށެވެ. މީގެއިތުރުން އެކަމަށް ބޭނުންވާ ޓެކްނިކަލް މުވައްޒަފުން އަލުން ހަމަޖައްސަން ޖެހުމަކީވެސް ރިވިއު ލަސްވި ސަބަބެއް ކަމަށްވެސް މިނިސްޓަރު ވިދާޅުވިއެވެ.
" މިދިޔަ ސަރުކާރުން މިނިމަމް ވޭޖުގެ ރިވިއުގެ މަސައްކަތް ނުކޮށްވާތީ މި މިނިސްޓްރީއާ މެންޑޭޓް ހަވާލުވި ހިސާބުން މި މިނިސްޓްރީއިން މި މަސައްކަތް ކުރުމަށްޓަކައި މިނިމަމް ވޭޖް ބޯޑު އަލުން އެކުލަވާލުމުގެ މަސައްކަތް ފަށައި 2024 ވަނަ އަހަރުގެ ޖުލައި މަހުގެ ތިން ވަނަ ދުވަހު އާ މިނިމަން ވޭޖް އެޑްވައިޒަރީ ބޯޑު ގާއިމް ކުރެވުނު،" ހައިދަރު ވިދާޅުވިއެވެ.
މިނިމަމް ވޭޖް ރިވިއު ކުރުމުގެ މަސައްކަތް މިހާރު ކުރިއަށްދަނީ އިންޓަނޭޝަނަލް ލޭބާ އޮގަނައިޒޭޝަންއާ ގުޅިގެން ކަމަށް މިނިސްޓަރު ވިދާޅުވިއެވެ. އަދި އެ މަސައްކަތް ކުރަނީ ދެ ފިޔަވައްސެއްގެ ދަށުންކަމަށް މިނިސްޓާރު ވިދާޅުވިއެވެ.
" ފުރަތަމަ ފިޔަވަހީގައި އެބޭފުޅުން ބައްލަވާނީ 'ދަ ރިވިއު އޮފް އިމްޕްލިމެންޓޭޝަން އޮފް މިނިމަމް ވޭޖާސް އިން ދަ މޯލްޑިވްސް'. މި މަސައްކަތަށް ބޭނުންވާ ޕްރައިމަރީ ޑޭޓާ އެއްކުރުމުގެ މަސައްކަތް މިހާރު ވަނީ ފެށިފަ. އަދި ތިރީގައި މި ދަންނަވާ ސެކަންޑަރީ ޑޭޓާ އެއްކުރުމުގެ މަސައްކަތް މި ދަނީ ކުރަމުން،" މިނިސްޓަރު ހައިދަރު ވިދާޅުވިއެވެ.
އެންމެ ލަސްވެގެން އަންނަ ޑިސެމްބަރުގެ ނިޔަލަށް މިނިމަމް ވޭޖް ރިވިއު ކުރުމުގެ މަސައްކަތް ނިންމައިލެވޭނެ ކަމަށް މިނިސްޓަރު ހައިދަރު ވިދާޅުވިއެވެ.
ހަތަރު ކެޓަގަރީއަކުން މިނިމަމް ވޭޖް ވަނީ ކަނޑައަޅައިފައެވެ.
- ކުދި ވިޔަފާރިތަކަށް، މަހަކު 4500ރ.
- މެދު ފަންތީގެ ވިޔަފާރިތަކަށް، މަހަކު 7000ރ.
- ބޮޑެތި ވިޔަފާރިތަކަށް، މަހަކު 8000ރ.
- ސިވިލް ސާވިސް، މަހަކު 7000ރ.
