މާލޭ ސިޓީ ކައުންސިލްގެ ސެކްރެޓަރީ ޖެނެރަލްއަކަށް އަބްދުލްމުހައިމިން ނަސީރު މި ހަމަޖެއްސީ، ކުރިން އެ މަގާމުގައި ހުންނެވި ވަޖީހު ނަސީރު މަގާމުން ވަކިކުރުމަށް ފަހު އެވެ. ވަޖީހު މަގާމުން ވަކިކުރީ، ގަލޮޅު ދެކުނު ދާއިރާގެ މެމްބަރު އިބްރާހިމް މުހައްމަދު ހިތް ހަމަ ނުޖެހި އަޑުގަދަކޮށް ހޫނުވި ޖަލްސާއެއްގައި ވޯޓަށް އަހައެވެ. އެ މައްސަލަ މިހާރު އޮތީ ޝަރީއަތުގެ މަރުހަލާގައެވެ.
މާލޭ ސިޓީ ކައުންސިލްގެ އެސްޖީގެ މަގާމަށް މި ފަހަރު ކުރިމަތިލާފައިވަނީ ހަތަރު ބޭފުޅެކެވެ. އޭގެ ތެރެއިން އެންމެ މަތިން މާކްސް ލިބިފައިވަނީ މުހައިމިން އަށެވެ. އޭނާ ކުރިން ހުންނެވީ އެ ކައުންސިލްގެ ޑިރެކްޓާ ޖެނެރަލް (ޑީޖީ)ގެ މަގާމުގަ އެވެ. އެ މަގާމަށް މުހައިމިން އައްޔަން ކުރަން ނިންމީ މިއަދު ބޭއްވި އެ ކައުންސިލް ބައްދަލުވުމުގައި ނެގި ވޯޓުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.
ސިޓީ ކައުންސިލްގެ ސެކްރެޓަރީ ޖެނެރަލަށް މުސާރައިގެ ގޮތުގައި 20،500ރ. އަދި އެގްޒެކެޓިވް އެލަވަންސްގެ ގޮތުގައި 15،000ރ. އާއެކު ޖުމުލަ 35،500ރ. ލިބޭނެ އެވެ.
