މި ބައްދަލުވުން ބޭއްވުނީ ބެއިޖިންގައި މިހާރު ކުރިއަށްދާ އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) ގެ ބޯޑު އޮފް ގަވަނަރުންގެ 10 ވަނަ އަހަރީ ބައްދަލުވުމުގެ ހަވާސާގައެވެ. މިނިސްޓަރު ޒަމީރު ވިދާޅުވިގޮތުގައި، މި ބައްދަލުވުމަކީ މިހާރު ކުރިއަށްދާ މަޝްރޫއުތަކާ ގުޅޭގޮތުން މަޝްވަރާކޮށް، ދެ ފަރާތުގެ ގުޅުން އިތުރަށް ބަދަހިކުރުމަށް ލިބުނު މުހިންމު ފުރުސަތެކެވެ.
މި ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގެންނެވީ ޗައިނާއަށް ކަނޑައަޅުއްވާފައި ހުންނަވާ ރާއްޖޭގެ ސަފީރު ޑރ. ފަޒީލް ނަޖީބާއި ފިނޭންސް މިނިސްޓްރީގެ ޑެޕިއުޓީ މިނިސްޓަރު އަހުމަދު ސާއިދު މުސްތަފާގެ އިތުރުން މިނިސްޓްރީގެ އިސް އެހެން ބޭފުޅުންނެވެ. ސީޑީބީގެ ފަރާތުން މި ބައްދަލުވުމުގައި ބައިވެރިވެވަޑައިގެންނެވީ އިންޓަނޭޝަނަލް ފައިނޭންޝަލް ބިޒްނަސް ޑިޕާޓްމަންޓުގެ ވައިސް ޕްރެޒިޑެންޓް ބައި ޝިޔުއަންއާއި އެ ބޭންކުގެ އެހެނިހެން ޑިޕާޓްމަންޓްތަކުގެ އިސްވެރިންނެވެ.
