މިއަހަރުގެ ތެރޭގައި ހުރިހާ އަތޮޅެއްގައި އައިޑީ ކާޑާއި ޕާސްޕޯޓު ހެދުމުގެ ހިދުމަތް ފެށުމަށް ސަރުކާރުން ނިންމާ އެ ޕްރޮގްރާމް އިފްތިތާހުކުރީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ.
މި ޕްރޮގްރާމްގެ ދަށުން ދިވެހި ރައްޔިތުން ކާޑް ޕްރިންޓްކޮށް ދޫކުރަން ފުރަތަމަ ފެށީ ގއ. ވިލިގިނލީގައެވެ. އެއީ ދިވެހި ރައްޔިތެއްކަން އަންގައިދޭ އައިޑީކާޑު މާލެ ފިޔަވައި އެހެން ރަށެއްގައި ޕްރިންޓްކުރަން ފެށީ ފުރަތަމަ ފަހަރެވެ.
މި ޕްރޮގްރާމްގެ ދަށުން ހއ. ހޯރަފުށީގައި އައިޑީކާޑް ޕްރިންޓްކޮށް ދޫކުރުމުގެ ހިދުމަތް މިއަދު ވަނީ ފަށާފައެވެ. މި ހިދުމަތާއި އެކު ހޯރަފުށީ ރައްޔިތުން މާލެ ނައިސް މިހާރު ރަށުގައި ތިބެ އައީޑީކާޑަށް އެދި އައީޑީކާޑު ނެގުމުގެ ފުރުސަތު ލިބޭނެއެވެ.
ހޯރަފުށީގައި މި ހިދުމަތް ފެށުމުން ވެރިރަށް މާލެ ފިޔަވާ ރާއްޖޭގެ 23 ރަށަކުން އައިޑީކާޑް ޕްރިންޓްކޮށް ދޫކުރުމުގެ ހިދުމަތް މިހާރު ލިބޭނެކަަމަށް ޑިޕާޓްމެންޓް އޮފް ނޭޝަނަލް ރެޖިސްޓްރޭޝަނުން ބުނެއެވެ.
