ޝުޖާއު ވިދާޅުވީ ހަރުދަނާ ގޮތެއްގައި ވިޔަފާރިތަކަށް ފަހި މާހައުލެއް "ޓްރޭޑްމާކްގެ ގާނޫނު" ބިލާއެކު ފަހިވެގެންދާނެ ކަމަށެވެ.
ސަރުކާރުގެ ފަރާތުން މަޑުއްވަރީ ދާއިރާގެ ޕީއެންސީ މެންބަރު އަހުމަދު ޒާހިރު ހުށަހެޅުއްވި 'ޓްރޭޑްމާކްގެ ގާނޫނު'ގެ ބިލަށް ބަހުސްކުރައްވަމުން ޝުޖާއު ވިދާޅުވީ، ވިޔަފާރިވެރިން ބުރަ މަސައްކަތަކުން ޓްރޭޑްމާކެއް އުފައްދައިގެން ވިޔަފާރިއެއްގެ ބްރޭންޑެއް އުފައްދައި، އެ ބްރޭންޑް އިސްތިހާރުކޮށްގެން ނޫނީ އޮރިޖިނަލް ޕްރޮޑަކްޓެއް މާކެޓަށް ނުވިއްކޭނެ ކަމަށެވެ.
ބިލުގައިވާ ގޮތުން، ޓްރޭޑްމާކްގެ އެކްސްކްލޫސިވް ހައްގު ލިބޭނީ ގާނޫނުގައިވާ ގޮތުގެ މަތީން އެ މާކް ރަޖިސްޓްރީކުރުމުންނެވެ.
ރާއްޖޭގައި ޓްރޭޑްމާކެއް ރަޖިސްޓްރީކޮށްދޭނީ 10 އަހަރު ދުވަހުގެ މުއްދަތަކަށެވެ. ބިލުގައި ބަޔާންކޮށްފައިވާ ކުށެއް ކޮށްފި މީހެއްގެ އަދަބަކީ 100،000 ރުފިޔާއާއި، 2،000،000 ރުފިޔާއާ ދެމެދުގެ އަދަކަށްވުރެ ބޮޑު ނޫން އަދަދަކުން ޖޫރިމަނާކުރުމެވެ. މިގޮތުން ބިލުގެ ބޭނުމަކީ އުފެއްދުންތެރިންނާއި ފަންނުވެރިންނަށް ފަހި މާހައުލެއް ގާއިމުކުރުމަށްޓަކައި ޓްރޭޑްމާކް ރަޖިސްޓްރީކޮށްދިނުމާ ގުޅޭ ނިޒާމެއް ގާއިމުކުރުން ކަމަށް ޝުޖާއު ވިދާޅުވިއެވެ.
