މި ލުއިތައް ދިނުމަށް އިންޑިއާއިން ނިންމީ ބޮޑުވަޒީރު މޯދީ ރާއްޖެއަށް ކުރައްވާ ދެ ދުވަހުގެ ރަސްމީ ދަތުރުފުޅުގައި ރައީސް ޑރ. މުހައްމަދު މުއިއްޒުއާއެކު ބޭއްވެވި މަޝްވަރާތަކަށް ފަހުގައެވެ. މީގެ އިތުރުން، އިންޑިއާއިން ވަނީ 4,850 ކްރޯޑް ރުޕީސް (ގާތްގަނޑަކަށް 750 މިލިއަން ޑޮލަރު) ގެ އައު ލައިން އޮފް ކްރެޑިޓެއް ރާއްޖެއަށް ދޫކުރުމަށްވެސް އެއްބަސްވެފައެވެ.
ފޮރިން ސެކްރެޓަރީ މިސްރީ ވިދާޅުވި ގޮތުގައި، ކުރީ ސަރުކާރާއެކު ހަދާފައިވާ 878 މިލިއަން ޑޮލަރުގެ އެލްއޯސީގެ ތެރެއިން ބޭނުންކޮށްފައިވަނީ ގާތްގަނޑަކަށް ދެބައިކުޅަ އެއްބައެވެ. އެކި ސަބަބުތަކާ ހެދި މި ފެސިލިޓީ އެއްކޮށް ބޭނުން ނުކުރި ނަމަވެސް، ކުރިން އޮތީ ޖުމްލަ ރީޕޭމެންޓް ދައްކަން ފަށަންޖެހޭ ގޮތަށްކަމަށާއި އެކަން މިހާރު ބަދަލުކޮށްދީފައިވާ ކަމަށް ބުންޏެވެ. ބޮޑުވަޒީރު މޯދީ، ރާއްޖޭގެ މިނިވަން ދުވަހުގެ ޖަލްސާގެ ޝަރަފުވެރި މެހެމާނުގެ ގޮތުގައި ބައިވެރިވެވަޑައިގަންނަވަން ވަނީ ހަމަޖެހިފައެވެ.
