މި އެވޯޑު ޝާރުކް އަށް ލިބިފައިވަނީ 30 އަހަރަށް ވުރެ ދިގު މުއްދަތެއްގެ ކެރިއަރަކަށް ފަހުގަ އެވެ. އެހެންކަމުން މި ކާމިޔާބީ އޭނާގެ ގިނަ ފޭނުން ދަނީ ފާހަގަ ކުރަމުން އެވެ.
އާދީއްތަ ދުވަހު، ޖޫހީ ވަނީ އިންސްޓަގްރާމްގައި ޝާރުކް އާއެކު ޑާންސްކުރަމުންދާ ހަނދާނީ ފޮޓޯއެއް ޝެއާކޮށް، މި ކާމިޔާބީއަކީ ޝާރުކް އަށް ހައްގު ކާމިޔާބީއެއް ކަމުގައި ބުނެފައެވެ.
މި މަޝްހޫރު ދެ ތަރިންގެ ފޭންސުން މި ފޮޓޯ ދެކެ ވަރަށް އުފާވެފައިވެ އެވެ. އަދި ކޮމެންޓްތަކުގައި އެ ދެމީހުންގެ ދެމިގެންދާ ރަހްމަތްތެރިކަމަށް ތައުރީފުކޮށްފައިވެއެވެ. ގިނަ ބަޔަކު އެ ދެމީހުންނަށް ގޮވާފައިވަނީ އެމީހުންގެ "އެންމެ މަގްބޫލު ޖޯޑި" ގެ ގޮތުގަ އެވެ. އަދި ޝާރުކްގެ އެކުވެރިއެއްގެ ގޮތުގައި އަހަރުތަކެއް ވަންދެން ޖޫހީ ހުރިކަމަށްޓަކައި އޭނާއަށް ޝުކުރު އަދާކޮށްފަ އެވެ.
ޖޫހީ އާއި ޝާރުކް ފުރަތަމަ ފަހަރަށް އެއް ސްކްރީނެއްގައި ފެނުނީ "ރާޖޫ ބަން ގަޔާ ޖެންޓްލްމަން" (1992) ފިލްމުގަ އެވެ. އޭގެ ފަހުން އެ ދެމީހުން ވަނީ "ދަރް"، "ޔެސް ބޮސް" އަދި "ފިރް ބީ ދިލް ހައި ހިންދުސްތާނީ" ފަދަ އެތައް ހިޓް ފިލްމެއްގައި އެކުގައި މަސައްކަތްކޮށްފަ އެވެ. އަދި 1999 ގައި "ޑްރީމްޒް އަންލިމިޓެޑް" ނަމަކަށް ކިޔާ ޕްރޮޑަކްޝަން ކުންފުންޏެއް އުފައްދައި، މިހާރު ވެސް އައި.ޕީ.އެލްގެ ކޮލްކަތާ ނައިޓް ރައިޑާސް ޓީމުގެ ވެރިންގެ ގޮތުގައި ތިބެއެވެ.
ޝާރުކް ވަނީ އެންމެ މޮޅު އެކްޓަރުގެ އެވޯޑު ވިކްރަންތް މަސޭ (12ވަނަ ފެއިލް) އާ ހިއްސާކޮށްފަ އެވެ. އަދި އެންމެ މޮޅު އެކްޓްރެސްގެ އެވޯޑު ރާނީ މުކަރްޖީ އަށް "މިސެސް ޗެޓަރްޖީ ވަރސަސް ނޯވޭ" ފިލްމުން ލިބިފައިވެއެވެ. "ޖަވާން" ގެ ކާމިޔާބީއަށްފަހު، ޝާރުކް ދެން ފެންނާނީ ސިއްދާރްތު އާނަންދު ޑައިރެކްޓްކުރާ އެކްޝަން ފުރިހަމަ ފިލްމެއް ކަމަށްވާ "ކިންގް" އިންނެވެ.
