ފަލަސްތީނު ރައްޔިތުން ސަހުޔޫނީ ބާރުތަކާ ދެކޮޅަށް ކުރަމުންދާ މަތިވެރި ޖިހާދުގައި ދިވެހި ރައްޔިތުން ވެސް ބައިވެރިވާންޖެހޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
Advertisement
މިނިސްޓަރު މިފަދައިން ވިދާޅުވީ ހުކުރު ދުވަހު ހަވީރު ރާއްޖޭގައި ކުރިއަށް ގެންދިޔަ، ގައްޒާގައި ހިންގަމުންދާ ގަތުލުއާންމު ހުއްޓާލުމަށް ގޮވާލާ ބޭއްވި ބޮޑު އެއްވުމުގައި ވާހަކަފުޅު ދައްކަވަމުންނެވެ.
"ދުލުން ކަމުގައި ވިޔަސް އަދި މުދަލުން ކަމުގައި ވިޔަސް އެ މީހަކަށް ބައިވެރިވެވެން އޮތް ގޮތަކަށް،" މި ޖިހާދުގައި ބައިވެރިވުމަށް މިނިސްޓަރު ވަނީ ނަސޭހަތްތެރިވެ ވަޑައިގެންފައެވެ.
މި އެއްވުމުގައި މިނިސްޓަރު ޝަހީމް ވަނީ ގައްޒާއަށް އަޅާފައިވާ ދަތިކުރުމުގެ ފިޔަވަޅުތައް ނައްތާލައި، ގައްޒާގެ ހިސާރު ނައްތާލުމަށް ގޮވާލައްވާފައެވެ. އަދި ބޯޑަރުތައް ހުޅުވާލައި، ގައްޒާއަށް އެހީތެރިކަން ފޯރުކޮށްދިނުމުގެ ފުރުސަތު ފަހިކޮށްދިނުމަށްވެސް ގޮވާލައްވާފައެވެ.
މިނިވަން މުސްތަގިއްލު ފަލަސްތީނެއް ގާއިމުވަންދެން އެ ގައުމުގެ ހައްގުގައި ދިވެހި ރައްޔިތުން ސާބިތުވެ ތިބެންޖެހޭ ކަމަށް މިނިސްޓަރު ޝަހީމް ވިދާޅުވިއެވެ. އިސްލާމިކް މިނިސްޓަރު ވަނީ ޔަހޫދީ ދައުލަތުން ގައްޒާގެ ރައްޔިތުންނާ ދެކޮޅަށް ހިންގާ ލާއިންސާނީ އަމަލުތަކާއި، އެ އަމަލުތައް ހިންގުމުގައި ބައިނަލްއަގުވާމީ ބޮޑެތި ބާރުތަކުން އެ ދައުލަތަށް ވަމުން އަންނަ އެހީތެރިކަން ވެސް ކުށްވެރިކުރައްވާފައެވެ.
ފަލަސްތީނަކީ ދިވެހި އުންމަތާ އަބަދުވެސް ވަރުގަދަ އުހުވަތްތެރިކަމުގެ ގުޅުމެއް އޮތް ގައުމެއް ކަމަށް ފާހަގަކުރައްވައި، ދިވެހިން މިއަދު އަޑުއުފުލަމުންދަނީ އެ ގައުމާއި ގައުމުގެ ރައްޔިތުންނާއި މަސްޖިދުލްއަގްސާ އަދި ގައްޒާގެ ދިފާއުގައި މަސައްކަތް ކުރާ މުޖާހިދުންނަށްޓަކައި ކަމަށްވެސް ވިދާޅުވިއެވެ.
