ވަގުތީ އަމުރުގައި އެދިފައި އޮތީ އޭނާއަށް ލިބޭނެ ކަމަށް ކަނޑައެޅި ފްލެޓު އެހެން މީހަކާ ހަވާލު ނުކުރަން ކޮންސްޓްރަކްޝަން މިނިސްޓްރީގެ މައްޗަށް އަމުރެއް ނެރެދިނުމަށެވެ.
މި މައްސަލަ ހުށަހެޅުމަށްފަހު މީޑިއާތަކާ ވާހަކަދައްކަވަމުން ވަކީލު މުހައްމަދު ނިޝާން އިބްރާހީމް ވިދާޅުވީ، އެ މައްސަލާގައި އެދުނީ މައްސަލާގެ މައުލޫއީ މައްސަލަ ވެއްދުމުގެ ކުރިންނާއި، އެ މައްސަލާގައި ކޯޓުން ގޮތެއް ނުނިމެނީސް އެ ފްލެޓު އެހެން މީހަކަށް ދީފާނެ ކަމުގެ ބިރު އޮތުމުގެ ސަބަބުން އެކަން ހުއްޓުވުމަށް ކަމަށެވެ.
ފްލެޓު ލިބޭނެކަން ކަށަވަރުވެ މިދިޔަ ސަރުކާރުގައި ލިއުންދީފައިވާ ހުރިހާ މީހުން ފަރުދީ ހައިސިއްޔަތުން ނަމަވެސް ކޯޓަށް މައްސަލަ ހުށަހެޅުމަށް ނިޝާން ގޮވާލެއްވި އެވެ. ނިޝާން ވިދާޅުވީ ފްލެޓުތައް އަތުލާފައިވަނީ އެއްބަަސްވުމާބެހޭ ގާނޫނާ ހިލާފަށް ކަމަށެވެ. ނަމަވެސް މި މައްސަލައިގެ އިތުރު ތަފްސީލެއް ވަކީލު ހިއްސާއެއް ނުކުރައްވައެވެ.
މާލޭ ރައްޔިތުން ތަމްސީލުކުރާ ބޭފުޅެއްގެ ހައިސިއްޔަތުން އެފަދައިން ފްލެޓު އަތުލަމުންދާ މީހުންގެ މައްސަލަތަކުގައި ވަކާލާތުކުރައްވަމުންދާ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވެސް އެތަނުގައި ހުންނެވި އެވެ.
ގެދޮރުވެރިޔާ ސްކީމްގެ ދަށުން އިމާރާތްކުރި 4،000 ފްލެޓު ލިބޭ މީހުންނާ އެކު ފަހި ދިރިއުޅުން ކޯޕަރޭޝަނުން މިހާރު އަންނަނީ އެގްރިމެންޓުގައި ސޮއިކުރަމުންނެވެ. މިދިޔަ ހަފުތާގެ ނިޔަލަށް 1،200 މީހުންނާ އެކު ސޮއިކޮށްފައިވާ ކަމަށް އެފްޑީސީން ވަނީ ބުނެފަ އެވެ.
