ނުރައްކާތެރި މިންވަރަކަށް މާއްދާއެއް އެކުލެވޭ އެމެރިކާގެ އުފެއްދުމެއް ރާއްޖޭގައި ވިއްކުން މިއަދު މަނާކޮށްފި އެވެ.
Advertisement
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ނެރުނު ބަޔާނެއްގައި ބުނީ ޑރ. ޕެޕާ ރާއްޖެއަށް އެތެރެކޮށްފައިވާ ކަމުގެ މައުލޫމާތު ޔޫރަޕުގެ ރެޕިޑް އެލާޓް ސިސްޓަމް ފޮ ފުޑް އެންޑް ފީޑް (އާރުއޭއެސްއެފްއެފް)ގެ ފަރާތުން މައުލޫމާތު ލިބިފައިވާ ކަމަށެވެ.
އެމްއެފްޑީއޭއިން ބުނީ ޑރ. ޕެޕާގައި ބެންޒޮއިކް އެސިޑް ހުންނަނީ، ހުންނަންޖެހޭ މިންވަރަށް ވުރެ ގިނައިން ކަމަށެވެ.
"ވީމާ ރައްކާތެރިކަމުގެ ފިޔަވަޅެއްގެ ގޮތުން މި އުފެއްދުން ރާއްޖެއަށް އެތެރެނުކުރުމަށާއި ނުވިއްކުމަށް އަދި ބޭނުން ނުކުރުމަށް އަންގަމެވެ،" އެމްއެފްޑީއޭއިން ބުނެއެވެ.
އިތުރު މައުލޫމާތު ހޯދުމަށް އެމްއެފްޑީއޭއަށް ގުޅުމަށް އެ ބަޔާނުގައި ވަނީ އިރުޝާދު ދީފަ އެވެ.
މުޅި ދުނިޔޭގައި ވެސް ބޮޑު މަޝްހޫރުކަމެއް ހޯދާފައިވާ ޑރ. ޕެޕާ އަކީ 1880 އިން ފެށިގެން އެމެރިކާގައި އުފައްދަމުންދާ ބުއިމެކެވެ. އެ ބުއިން އުފައްދާ ކުންފުނިން މިދިޔަ އަހަރު އެކަނި ވެސް 15 ބިލިއަން ޑޮލަރުގެ އާމްދަނީއެއް ހޯދި ކަމަށް މާލީ ރިޕޯޓުތައް ބުނެ އެވެ.
