ރައީސް މި ޔަގީންކަން ދެއްވީ ހދ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ކުރިނބީއަށް ވަޑައިގެން، އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ކުރިނބީ ސިއްހީ މަރުކަޒުގައި ގާއިމުކުރާ އާ އިމާރާތުގެ މަސައްކަތް އެމްޓީސީސީއާ ވަނީ ހަވާލުކޮށްފަ އެވެ. ރައީސް ވިދާޅުވި ގޮތުގައި، މި އިމާރާތާއެކު ސިއްހީ މަރުކަޒަށް އިތުރު ޖާގަ ލިބި، ވޯޑުތަކާއި ލެބޯޓްރީ އަދި ޕަބްލިކް ހެލްތު ޔުނިޓެއް ފަދަ އާ ހިދުމަތްތައް ތައާރަފު ކުރެވިގެންދާނެ އެވެ. އަދި އާ އިމާރާތުގެ މަސައްކަތް ނިމުމުގެ ކުރިން ވެސް، މިއަހަރު ތެރޭގައި ބޭނުންވާ މުވައްޒަފުން ހަމަޖައްސައިގެން ހިދުމަތް 16 ގަޑިއިރަށް އިތުރުކުރަން މަސައްކަތް ކުރައްވާނެ ކަމަށް ވެސް ރައީސް ވިދާޅުވި އެވެ.
މި ދަތުރުފުޅުގެ ތެރެއިން ރައީސް ވަނީ ކުރިނބީގައި ބޭންކް އޮފް މޯލްޑިވްސްގެ އޭޓީއެމް ހިދުމަތް އިފްތިތާހުކޮށްދެއްވައި، ފިޓްނަސް އެންޑް ރިކްރިއޭޝަން ސެންޓަރުގެ ބިންގާ ވެސް އަޅުއްވައިދެއްވާފަ އެވެ. މީގެ އިތުރުން، އެރަށު ސްކޫލްގައި ހަތަރު ކްލާސްރޫމާއެކު މަލްޓި ޕާޕަސް ހޯލެއް އެޅުމުގެ މަޝްރޫއު ވެސް ވަނީ ފަށާފަ އެވެ. ރައީސް ވަނީ ކުރިނބީގެ ތަރައްގީއަށް ބޭނުންވާ އިތުރު ކަންކަން ވެސް ކޮށްދެއްވާނެ ކަމުގެ ޔަގީންކަން ރައްޔިތުންނަށް ދެއްވާފަ އެވެ.
