މިފްކޯއިން ފުވަމުލަކު މަސް ގަންނަނ ނިންމާ އެ މަސައްކަތް މިމަހު ފަށާނެކަން އިއުލާން ކުރީ އެ ކުންފުނީގެ ސީއީއޯ ރިޓަޔާޑް ބްރިގޭޑިއާ ޖެނެރަލް ފަރުހާތު ޝަހީރު މިމަހު ކުރީކޮޅު ފުވައްމުލަކަށް ކުރެއްވި ދަތުރުގައި އެސިޓީގެ ކައުންސިލާއެކު ބޭއްވި ބައްދަލުވުމެއްގައެވެ.
މިފްކޯއިން ބުނީ އެ ކުންފުނީގެ ބޯޓު މިދިޔަ ބުރާސްފަތި ދުވަހު ފުވައްމުލަކަށް ބަނދަރުކޮށް އިއްޔެއިން ފެށިގެން އެ ސިޓީން މަސްގަންނަން ފަށާފައިވާ ކަމަށެވެ.
ފުވައްމުލަކުގައި ފަށާފައިވާ މަސް ޕްރޮސެސްކުރާ މަރުކަޒު މި އަހަރުގެ ތެރޭގައި އޮޕަރޭޝަނަލައިޒްކޮށް، ފުވައްމުލަކު ރައްޔިތުންނަށް ޕްރޮސެސްކޮށްފައި ހުރި މަސް ގަންނަން ލިބޭނެ އިންތިޒާމު ހަމަޖައްސައިދޭނެ ކަމުގެ ޔަގީންކަންވެސް މިފްކޯއިން ވަނީ ދީފައެވެ.
އައްޑޫން ގަންނަ މަސް ހުވަދު އަތޮޅަށް ގެންދިއުމުގެ ބަދަލުގައި ސީދާ އައްޑޫން ރާއްޖޭން ބޭރަށް އެކްސްޕޯޓް ކުރުމުގެ މަސައްކަތް އަންނަ މަހުގެ ތެރޭގައި ފަށާނެ ކަމަށް މިފްކޯ އިން ވަނީ ކުރިން ބުނެފަ އެވެ.
