އީސީން މިއަދު އާއްމުކުރި ތަފާސް ހިސާބުތަކުގައިވާ ގޮތުން ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގައި ވާދަކުރުމަށް 10 ދުވަހުގެ ތެރޭގައި 2،254 ފޯމު ވަނީ ހުށަހަޅާފަ އެވެ. އެއީ، ކައުންސިލްތަކަށް ވާދަކުރުމަށް ހުށަހެޅި 1،276 ފޯމާއި، އަންހެނުންގެ ކޮމިޓީތަކަށް ވާދަކުރުމަށް ހުށަހެޅި 978 ފޯމެވެ.
ކައުންސިލްތަކަށް ވާދަކުރުމަށް ސިޔާސީ ޕާޓީތަކުން މިހާތަނަށް 994 ފޯމު ހުށަހަޅާފައިވާއިރު، އޭގެ ތެރެއިން ޝަރުތު ފުރިހަމަވާ ކަމަށް އިލެކްޝަންސް ކޮމިޝަނުން ކަނޑައަޅާފައިވަނީ 852 ފޯމެވެ. އަދި ޕާޓީތަކުން ހުށަހެޅި ފޯމުތަކުގެ ތެރެއިން 142 ފޯމެއް ޝަރުތު ހަމަނުވާ ކަމަށް ކަނޑައަޅާފައިވާއިރު، އޭގެ ތެރެއިން 84 ފަރާތަކުން ވަނީ އަލުން ފޯމު ހުށަހަޅާފަ އެވެ.
ކައުންސިލްތަކަށް އަމިއްލަ ގޮތުން ވާދަކުރަން 282 ފޯމު ހުށަހަޅާފައިވާއިރު، އޭގެ ތެރެއިން 188 މީހުންގެ ޝަރުތު ފުރިހަމަވެއެވެ. އަދި 94 މީހުންގެ ޝަރުތު ފުރިހަމަނުވާ ކަމަށް އިލެކްޝަންސް ކޮމިޝަނުން ވަނީ ކަނޑައަޅާފަ އެވެ. ޝަރުތު ހަމަނުވާ ކަމަށް ކަނޑައެޅި ފޯމުތަކުގެ ތެރެއިން 49 މީހުން އަލުން ފޯމު ހުށަހަޅާފައިވާ ކަމަށްވެސް އިލެކްޝަނުން މައުލޫމާތު ދެއްވަ އެވެ.
އަންހެނުންގެ ކޮމިޓީތަކަށް ސިޔާސީ ޕާޓީތަކުން މިހާތަނަށް 795 ފޯމު ހުށަހަޅާފައިވާއިރު، ޝަރުތު ހަމަވަނީ 692 މީހުންނެވެ. އަދި ޝަރުތު ހަމަނުވާކަމަށް ކަނޑައެޅި 103 މީހުންގެ ތެރެއިން 54 މީހުން އަލުން ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަނުން ބުނެ އެވެ. އަމިއްލަގޮތުން ވާދަކުރަން ފޯމު ހުށަހެޅި 183 މީހުންގެ ތެރެއިން 125 މީހެއްގެ ޝަރުތު ފުރިހަމަވާކަމަށް ވަނީ ކަނޑައަޅާފަ އެވެ.
މިފަހަރުގެ އިންތިހާބުގައި ރަށުކައުންސިލްތަކާއި ސިޓީކައުންސިލްތަކަށް ހިމެނޭ ގޮތުން އިންތިހާބުކުރާނީ 629 ކައުންސިލަރުންނެވެ.
ލޯކަލް ކައުންސިލްތަކަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ކުރިމަތިލާން އީސީން ހުޅުވާލީ މިމަހުގެ 17 ވަނަ ދުވަހު އެވެ. އިންތިހާބުގައި ވާދަކުރަން ފޯމު ހުށަހެޅުމުގެ ސުންގަޑިއަކީ އަންނަ އާދީއްތަ ދުވަހުގެ 3:00 އެވެ.
ލޯކަލް ކައުންސިލް އިންތިހާބަށް ކުރިމަތިލުމަށް އެދި ފޯމު ހުށަހެޅުމަށް އިލެކްޝަންސް ކޮމިޝަން އިން ދީފައިވަނީ ވަރަށް ކުރު މުއްދަތެއް ކަމަށް އިދިކޮޅު އެމްޑީޕީން މިއަދު ވަނީ ބުނެފަ އެވެ.
އެމްޑީޕީގެ ފަރާތުން ކުރިމަތިލާ ކެންޑިޑޭޓުންގެ ފޯމުތައް ހުށަހެޅުމުގެ މަސައްކަތުގައި ހަރަކާތްތެރިވެވަޑައިގެންނެވީ ކުރީގެ މަޖިލިސް މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ، ކަރެކްޝަނުން ކުށުގެ ރެކޯޑް ސާފުކުރަން ބަލާއިރު، އޮންލައިންކޮށް އެކަން ކުރުން މި މަހުގެ 22 އިން ފެށިގެން ހުއްޓާލާފައިވާ ކަމަށް މައުލޫމާތު ލިބޭ ކަމަށެވެ. އެހެންވެ، މިހާރު އެކަން ކުރަންޖެހެނީ އެތަނަށް ގޮސްގެން، "ސަލާން ޖަހައިގެން" ކަމަށް އޭނާ ވިދާޅުވި އެވެ.
މެންދުރުފަހު 3ގެ ފަހުން ޕޯޓަލަށް ފޯމު ހުށަނޭތީ އެ ކަންބޮޑުވުން ވެސް އޭނާ ފާހަގަކުރެއްވި އެވެ. މުހައްމަދު ރަޝީދު ވިދާޅުވީ 24 ގަޑިއިރު ފޯމު ހުށަހެޅޭނެ އިންތިޒާމުތަކާ އެކު، ފޯމު ހުށަހެޅުމަށް ވީހާ ވެސް ފަސޭހަ ގޮތަކަށް އިންތިޒާމުތައް ހަމަޖައްސައިދޭންޖެހޭ ކަމަށެވެ.
އިންތިހާބުގައި ވާދަކުރަން ބޭނުންވާ ފަރާތްތަކުން ފޯމު ހުށަހަޅަން ޖެހޭނީ، އިލެކްޝަންސް ކޮމިޝަންގެ މައި ޕޯޓަލް މެދުވެރިކޮށެވެ. އަދި ސިޔާސީ ޕާޓީތަކަށް ހާއްސަ ކޮށްފައިވާ ސިމެދަ ޕޯޓަލް މެދުވެރިކޮށްވެސް ޕާޓީތަކުން ވާދަކުރާ ކެންޑިޑޭޓުންގެ ފޯމު ހުށަހެޅޭނެ އެވެ.
