ads
ފުރަތަމަ ހުއްޓުވަން ޖެހެނީ ސާބިތު ނުހިފޭ ވާހަކަ ދެއްކުން!
ހެޔޮ ނިޔަތް އޮތް ނަމަ ފުރަތަމަ ހުއްޓުވަންވީ ސާބިތު ނުހިފޭ ވާހަކަ ދެއްކުން!
ކޮންޓްރޯލް ކުރަންވީ މީޑިއާތަ؟ ސާބިތު ނުހިފޭ ވާހަކަދެއްކުންތަ!؟ މީޑިއާތަކާއި ނޫސްވެރިން ރެގިއުލޭޓު ކުރުމުގެ ނަމުގައި ބޮޑެތި އަދަދުތަކުން ޖޫރިމަނާކޮށް މީޑިއާ ކޮންޓްރޯލް ކުރުމަށްޓަކައި ރައްޔިތުންގެ މަޖިލީހަށް ހުށަހަޅާފައި އޮތް ބިލާ ދެކޮޅަށް މަސައްކަތް ކުރާ ކޮންމެ ނޫސްވެރިއެއް ވެސް އެ ބިލާ ދެކޮޅަށް ނުކުމެ އެ ތިބީ އެއީ ކިހާ ނުރައްކާތެރި ބިލެއްކަން އެނގި ތިބެ އެވެ.
Advertisement

ނޫސްވެރިކަމަކީ ގާނޫނުއަސާސީން ކަށަވަރު ކޮށްދީފައިވާ ވަރަށް ފުޅާ ހައްގެކެވެ. ދައުލަތާއި ސަރުކާރު ޒިންމާދާރުކޮށް، ޖަވާބުދާރީކުރުވައި، ފާރަވެރިވާން އޮތް ޑިމޮކްރަސީގެ ހަތަރު ވަނަ ބާރެވެ. އެ ބާރު ހަނިކުރަން ކުރެވޭ ކޮންމެ ކަމެއް ވާނީ ފަހަތަށް އަޅާ ބޮޑު ފިޔަވަޅަކަށެވެ.

ދުނިޔޭގެ ހަގީގަތަކީ ހިޔާލުގައި ދެނެތް ތަޅެއް ނޭޅުވޭނެ އެވެ. އެއީ ދައުލަތުގެ ތިޖޫރީ ލިބުނަސް އަދި ވާނެ ކަމެއް ނޫނެވެ. ނޫސްވެރިންނާ ނުލައި ޑިމޮކްރަސީ ފުރިހަމައެއް ވެސް ނުވާނެ އެވެ. އެއީ މިއަދު ތަހުޒީބު މުޖްތަމައުތައް ބަލައިގަނެފައިވާ ހަގީގަތެވެ. ވެރިކަމުގައި ތިބި ބައެއްގެ ކޮރަޕްޓް ވާހަކަތައް ރިޕޯޓް ކުރުމުން އެކަންކަން ހުއްޓުވޭނެ ކަމަށް ސިޔާސީން ގަބޫލު ކުރުމަކީ މޮޔަކަމެކެވެ.

ނަމަވެސް ސިޔާސީންގެ ނަޒާހަތްތެރިކަމެއް ހުރި ނަމަ މަޖިލީހުގެ ބޮޑު އަގުލަބިއްޔަތުން ކުރެވިދާނެ ރަނގަޅު ކަމެއް އެބަ އޮތެވެ. އެއީ ސާބިތު ނުހިފޭ ވާހަކަ ދެއްކުން!؟ ހުއްޓުވުމެވެ. ގިނަ ފަހަރަށް ނޫސްވެރިން ރިޕޯޓް ކުރަނީ މީހަކު ބުނި ވާހަކަ އެކެވެ. އެވާހަކަ ބުނި މީހާ ކުށްވެރި ނުވެ އެވާހަކަ ލިޔާ ނޫސް ނުވަތަ ނޫސްވެރިޔާ ކުށްވެރިވާ ނަމަ އަސްލު މައްސަލައަކަށް ހައްލެއް ނާދެ އެވެ.

ބައެއް މިސާލު ތަކެވެ. ރައްޔިތުންގެ މަޖިލީހުގެ ތަޅުމުގައި ވާހަކަ ދައްކަވަމުން، ނޫސްވެރިން އުލުބައިންދަން ޖެހޭ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހު، ދެއްކެވި ވާހަކަ އެވެ. ދައުލަތުގެ ޒިންމާދާރު މަގާމެއްގައި ހުރި މީހެއްގެ ފަރާތުން ކިހާ ބިރު ވެރި ވާހަކަ އެއް ތޯ އެވެ. މިދިޔަ ބުދަ ދުވަހު ބޭއްވި މަޖިލީހުގެ ޖަލްސާގައި، ސަރުކާރުގެ ބާރު ފޯރުވޭ ކޮމިޝަނަކުން މީޑިއާތަކާއި ނޫސްވެރިން ރެގިއުލޭޓް ކުރުމުގެ ނަމުގައި ބޮޑެތި އަދަދުތަކުން ޖޫރިމަނާކޮށް ހަރުކަށި ފިޔަވަޅުތަކެއް އެޅޭ ގޮތަށް މަޖިލީހަށް ހުށަހަޅާފައިވާ ބިލަށް ބަހުސް ކުރައްވަމުން ފަލާހު ވިދާޅުވީ ނޫސްވެރިން ޖަލަށް ލުމުގެ ބަދަލުގައި "އުލުބައިންދަންވީ" ކަމަށެވެ. މަޖިލީހުގެ ތަޅުމުގައި ފާޅުކަން ބޮޑު ގޮތެއްގައި ބައެއްގެ މައްޗަށް އަނިޔާވެރިވުމަށް ފަލާހު ގޮވާލެއްވި އިރު އެކަން ނުބެލި އެވާހަކަ އިން ޓެރަރިޒަމަށް ހިތްވަރު ލިބޭ ކަމަށްބުނެ ދެއްކި ވާހަކަ ރިޕޯޓް ކުރުން ކުށްވެރިވާންވީ ސަބަބެއް ނުވިސްނެ އެވެ.

ސާބިތު ނުހިފޭ އެހެން ސިޔާސީއެއް ދެއްކި ވާހަކައަކަށް ޖެހިލަމާތޯއެވެ؟

އެމްއެމްޕީއާރުސީން ރަށްތައް ދޫކޮށްގެން ލިބުނު ފައިސާ ވަގަށް ނެގި މައްސަލައިގައި މަޖިލީހަށް ހުށަހެޅުނު ކުއްލި މައްސަލައަކަށް ބަހުސް ކުރައްވަމުން އެއް މެމްބަރަކު އަނެއް މެމްބަރަކާ ދިމާލަށް ރިޝްވަތުގެ ތުހުމަތުތައް ވަނީ ކުރައްވައިފަ އެވެ. އަދި ބައެއް މެމްބަރުން ފައިސާގައި ހިއްޕެވި ކަމަށް ވެސް ވިދާޅުވެފައިވެ އެވެ. އެ ވާހަކަތަކާ ގުޅިގެން ނިޒާމީ މައްސަލައެއް ނަންގަވައި ހޯރަފުށީ ދާއިރާގެ އޭރުގެ މެމްބަރު މުހައްމަދު އިސްމާއީލް ވިދާޅުވީ "އެ ފައިސާ ގޯނި ހިފައިގެން" މެމްބަރުން ކައިރި އަށް ދިޔަ ކަމަށެވެ. ނަމަވެސް ދައުލަތުގެ ފައިސާ "ގޯނީގަ" ބެހި ކަމަށް އިއުތިރާފްވި މީހާއަށް އެޅުނު ފިޔަވަޅެއް ނެތެވެ. މަޖިލީހަށް ހުށައަޅަންވީ ސާބިތު ނުހިފޭ ވާހަކަ ދައްކާ މީހުންގެ ދޫ ބަންދު ކުރެވޭނެ ބިލެވެ.

ސާބިތުކޮށް ނުދެވުނު އެހެން ސިޔާސީއެއް މިފަހުން ދެއްކި ވާހަކަ އެކެވެ. މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ ކުރިއަށް އޮތް މަދު ދުވަސްކޮޅެއްގެ ތެރޭގައިި ޕީއެންސީގެ 13 ނުވަތަ 14 މެންބަރުން ގޮނޑި ގެއްލުނަސް ހެޔޮކަމަށް ގައުމާއި، ރައްޔިތުންގެ ހައްގުގައި ޕީއެންސީ ދޫކޮށް ރައްޔިތުންގެ ފަޅިއަށް އަރާނެ ކަމަށެވެ. އެގޮތުން މިފަހުން ބޭއްވި ޕީއެންސީގެ ޕާލަމެންޓްރީ ގްރޫޕްގެ ބައްދަލުވުމުގައި މެންބަރުންގެ ކަންބޮޑުވުންތަށް ބަންޑުންކޮށްލަމުން ބައެއް މެންބަރުން ސަރުކާރުން ގެންގުޅޭ ނުރަނގަޅު ސިޔާސަތުކަށް ބަސް ނުބުނެ އަބަދު މަންމަނުވެފައި ނުތިބެވޭނެ ކަމަށާއި ގައުމާއި ރައްޔިތުންގެ ހައްގަގައި ހައްގަބަސް ބުނަން ނިކުންނާނެ ކަމަށް ވިދާޅުވި ކަމަށް އައްބާސްގެ ޕޯސްޓުގައިވެ އެވެ.

"ރައީސް ޑރ. މުއިއްޒު ދެކިލައްވާ ގޮތުގައި ރައްޔިތުންގެ މަޖިލިސް މެންބަރުންނަކީ އެއްވެސް ބައެއް ނޫންކަމަށް ދެކިގެން ރައްޔިތުންގެ މަޖިލިސްގެ މެންބަރުންނާ އެއްވެސް މަޝްވަރާ ކުރުމެއް ނެތި ކުއްލި ކުއްލި ކަންކަން ކުރައްވާތަން ބަލަން ނުތިބޭނެ ކަމަށާއި އަދި މަޝްވަރާ ކުރުމެއް ނެތި ރައްޔިތުންނާ ގުޅުން ހުރި ކަންކަމުގައި ކުއްލި ކުއްލިއަށް މަޖިލީހަށް ހުށައަޅުއްވާ ބިލަތަކަށް ވޯޓު ނުދެއްވާނެ ކަމަށްވެސް ގިނަ މެންބަރުންތަކެއް ވަނީ ވިދާޅުވެފައި،" އައްބާސް ވިދާޅުވި އެވެ.

އައްބާސް ކުރެއްވި ޕޯސްޓަށް ޕީއެންސީގެ މެންބަރުން ގަދައަށް ރައްދު ދެއްވި އެވެ. ބުނީ އައްބާސް ދެއްކެވީ "ސާބިތި ނުހިފޭ" ވާހަކަތަކެއް ކަމަށެވެ. މި ވާހަކަތަކަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް ވިދާޅުވެފައި އައްބާސް ފެތުރީ "ދޮގު ހަބަރު" ކަމަށެވެ. މަޖިލީހުގައި މެންބަރުން ދައްކަވާ ވާހަކަ ރިޕޯޓް ކުރާ ނޫސްވެރިން ކުށްވެރި ވިޔަ ނުދޭ ށެވެ. ކުށުގެ ހާލިން ނެރެންވީ ދޮގު ހަބަރަށް މަގުދައްކާ ސިޔާސީން ނެވެ. އަދި "ތެދު" ނުވަތަ 'ދޮގު" ކޮންޓްރޯލްކޮށް އަދަބު ދޭންވީ ވެސް އެ ފަދަ ވާހަކަ ދައްކާ އޮޅުވާލަން އުޅުއްވާ ސިޔާސީންނެވެ.

އެހެން މިސާލެކެވެ. މަރުހޫމް ޑރ. އަފްރާޝިމް މައްސަލާގައި އަދާލަތު ޕާޓީގެ ރައީސް އިމްރާން އަތުގައި ހެކި އޮތް ކަމަށް ވިދާޅުވު ދެއްކެވި ވާހަކަ އެވެ. ރައީސް ޔާމީންގެ ސަރުކާރާ ދެކޮޅަށް 2015 ވަނަ އަހަރު ބޭއްވި މޭޑޭ މުޒާހަރާގައި އިމްރާން ވިދާޅުވެފައިވަނީ ޑރ. އަފްރާޝީމް އަލީގެ މަރާއި ނޫސްވެރިޔާ އަހްމަދު ރިޟްވާނު ގެއްލުވައިލުމުގެ ހަގީގަތް ޔާމީނަށް އެނގިވަޑައިގަންނަވާނެ ކަމަށެވެ. އަދި އެކަމުގެ ހެކިވެސް އޭނާގެ އަތުގައި އެބަހުރި ކަމަށް ވިދާޅުވި އެވެ.

ނަމަވެސް ރައްޔިތުންގެ މަޖިލީހަށް އިމްރާން ހާޒިރުކޮށް ސުވާލުކުރުމުން ވިދާޅުވީ، އެ ހެކިތައް ފުލުހުން ގެންގޮސްފައިވާ ކަމަށާއި އެ ހެކިތައް މިހާރުވީ ހިސާބެއް އެނގޭނީ މޭޑޭ މުޒާހަރާގެ ތެރެއިން އޭނާ ހައްޔަރު ކުރި ފުލުހުންނަށް ކަމަށެވެ. އަދި ވިދާޅުވެފައި ވަނީ އޭނާ ހައްޔަރު ކުރީ މޫނު ނިވާކޮށްގެން ތިބި ފުލުހުން ކަމަށްވުމުން އެއީ ކޮން ބައެއްކަން ވެސް ފާހަގަ ކުރަން ނޭނގޭ ކަމަށެވެ.

މީގެ އިތުރުން އިމްރާން މިފަހުން އެކްސްގައި ކުރެއްވި ޕޯސްޓެއްގައި އިމްރާން ވިދާޅުވީ ޑރ. އަބްދުލްމަޖީދު ގެ ކުއްލި މަރާ ގުޅިގެން ގިނަ ދުވަސްތަކެއް ވަންދެން ހިތުގައި އުފެދިފައި އޮތް ޝައްކު މިހާރު ޔަގީންވާ ހިސާބަށް ގޮސްފައިވާ ކަމަށެވެ.

"އާއެކެވެ، ޑޮކްޓަރ މަޖީދު ބަޔަކު ޝަހީދުކޮށްލީއެވެ." އޭނާ ލިޔުއްވާފައިވެ އެވެ.

ރާއްޖޭގެ ފުރަތަމަ އިސްލާމިކް މިނިސްޓަރު އަދި މަޝްހޫރު ދީނީ އިލްމުވެރިޔާ ޑރ. އަބްދުލް މަޖީދު އަބްދުލްބާރީ އަވަހާރަވީ ނޫން ކަމަށާއި، ޝަހީދުކޮށްލީ ކަމަށް ވިދާޅުވެ ކުރީގެ ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން އަބްދުﷲ މި ދެއްކެވި ވާހަކަ ސާބިތު ކޮށްދިނުމުގެ ވިސްނުމެއް ވެސް އަދި އެ ވާހަކަތަކުގެ ހަގީގަތް ހޯދަން ވެސް ކަމާއި ބެހޭ އިދާރާ އަކުން އިމްރާން އަށް ސުވާލެއް ކޮށް ނުލާކަމަށް ވެ އެވެ. ގޯސްވީ އިމްރާންގެ ހަބަރު ގެނެސް ދިން ނޫސް އެޖެންސީ ތަކެވެ.

އިމްރާން ދެއްކެވި މި ދެ ވާހަކައިން ވެސް އުފެދުނީ ފިތުނައާއި ދެބަސްވުމެވެ. ލިބުނު އެއް ވެސް މޮޅެއް ނެތެވެ. ހޯމް މިނިސްޓަރުކަން ލިބިވަޑައިގެން އެ މަގާމުގައި ހޭދަ ކުރެއްވި ފަސް އަހަރު ވެސް ދިޔައީ އަފްރާޝީމްގެ މަރުގެ ހަގީގަތް ރައްޔިތުންނަށް ބުނެ ނުދެވި އެވެ. އިމްރާގެ ވާހަކަ ވެސް ވީ "ސިޔާސީ މައިކް" ލިބުމުން ހަދާލި ބޮޑު މުނާފިގުންގެ ދޮގު ހަބަރަކަށެވެ.

ސާބިތު ނުހިފޭ ވާހަކަ ދެއްކުން ކަމަށް ބަލާނެ މިންގަނޑުތައް ކަނޑައަޅައި އެ ކަންކަން ބަލައި ތަހުގީގު ކުރާނެ ތަނަކާއި އެ ފަދަ މައްސަލަތަކަށް އިންސާފު ގާއިމް ކުރާނެ ހާއްސަ އިދާރާއެއް އުފައްދާ އެ ދެ ތަނަކީ އެއް ކުލައިން ޖަރީވެފައިވާ ބަޔަކަށް ތިބޭ ތަންތަނަށް ނުހަދާ އަދި އެ ދެ ތަނަށް ބޭނުންވާ މީހުން ހޮވުމާއި ވަކި ކުރުމަކީ ސީދާ ރައްޔިތުންގެ ވޯޓަކުން ކުރާ ކަމެއްގެ ގޮތުގައި ހަމަޖައްސައިގެން ނޫނީ ސާބިތު ނުހިފޭ ވާހަކަ ދެއްކުން ކޮންޓްރޯލެއް ނުވާނެ އެވެ.

މަޖިލީސް ތަޅުން ހިމެނޭހެން ސިޔާސީ އެކި އެއްވުންތަކުގައި ސާބިތު ނުހިފޭ އެތައް ވާހަކައެއް ދިވެހި މުޖްތަމައުން ކޮންމެ ދުވަހަކު ދަނީ އިވެމުން ނެވެ. އެހެން ކަމުން "ދޮގު" އުފައްދާ މެޝިނުތައް ހަލާކުކޮށް ނުލެވި ދެއްކި ވާހަކަތައް ރިޕޯޓް ކުރުން ގާނޫނުން ހުއްޓުވުމަކުން އަސްލު މައްސަލައަށް ފަރުވާއެއް އަދި ނުލިބެ އެވެ. މުޅި މައްސަލާއިގެ ހައްލަކީ ސާބިތު ނުހިފޭ ވާހަކަ ދެއްކުން ހަލާލުކަމެއްގެ ގޮތުގައި ތަންފީޒުވަމުންދިޔުން ނުހުއްޓުވި އޮތުމެވެ. އަދި އެކަން ކުރެވޭނެ ގާނޫނީ މަގެއް ކޮށާފަ ނެތުމެވެ.

ސިޔާސީ ބޭނުމަށް ރައްޔިތުންގެ މެދުގައި ނަފްރަތު އުފައްދައިގެން ޕޯޑިއަމްތަކުގައި އަޑުގަދަކޮށް ވާހަކަ ދައްކާ މީހުން ހުއްޓުވިގެން ނޫނީ ދޮގާ ފިތުނައިން ދިވެހި މުޖްތަމައު މިންޖު އެއް ނުކުރެވޭނެ ނޫންތޯ އެވެ.؟ މީޑިއާ އާއި ސިޔާސީ މީހުންނާއި އިލުމުވެރިން އަދި ރައްޔިތުންގެ މައްޗަށް ތަންފީޒުވާގޮތަށް ސާބިތުނުހިފޭ ވާހަކަ ދެއްކުން މަދު ކުރެވޭނެ މުޖުތަމައެއް ބިނާ ކުރުމަށް ހަދަންޖެހޭ ގާނޫނީ ނިޒާމް ހެދުމާއި އެނޫން ވެސް ކަންކަންކޮށްގެން ނޫނީ ކުރިމަތިވެފައިވާ ބޮޑު މައްސަލަ ހައްލުވާނެ ކަމަށް ދެކޭ ނަމަ އެއީ ކުށް ހީއެކެވެ.

އެހެން ކަމުން ރާއްޖޭގެ ގާނޫނުތައް އިތުރަށް ވަރުގަދަ ވާންވީ މިހާރު ހުރި ގާނޫނުތައް ތަންފީޒު ކުރުމުގައި ތަފާތު ކުރުމެއް ނެތި ފިޔަވަޅު އެޅިގެންދާނަމަ އަބުރު ވެސް އޮތީ ހީ ރައްކާތެރިކުރެވިފަ އެވެ.

ދަންނަވަންތޯ އެވެ. ހޭޓް ސްޕީޗު ނުހުއްޓުވި ނޫސްވެރިން ތަޅު އަޅުވަން ކުރާ މަސައްކަތް ވާނީ ނަފުރަތުގެ އަމަލު ހިންގުމަށް ހުޅުވޭނެ އިތުރު ދޮރަކަށެވެ. ރައްޔިތުންގެ މަޖިލީހަށް މިހާރު ހުށަހަޅާފައިވާ ސަރުކާރުން މީޑިއާތަކުގެ ކޮންޓްރޯލް ނަގާ ބިލަށް ވެރިކަން ކުރާ ޕާޓީ ޕީއެންސީން ފުރިހަމައަށް ތާއީދު ކުރި ނަމަވެސް މީޑިއާތައް ރެގިއުލޭޓް ކުރެވި އަދި ސާބިތު ނުހިފޭ ވާހަކަތައް ހުއްޓުވޭނެ ކަމަށް ތިޔަބޭފުޅުން ނަށް "ހީފުޅުވިޔަސް" އަސްލު ގިނަ މައްސަލަތަކުގެ ހައްލެއް ބިލަކުން ނުފެނެ އެވެ.

ސުވާލަކީ އެ ވަރު ބާރެއް ދީގެން އެ ފަދަ މައްސަލަތައް ތަހުގީގު ކުރާނެ ތަނަކާއި އެ ފަދަ މައްސަލަތައް ބަލާ ނިޔާ ކަނޑައަޅާނެ އުފައްދަން ނުކެރިގެން އުޅެނީ ކީއްތޯ އެވެ. އިސްލާމީ މި މުޖުތަމައުގައި އެ ނުބައި އަމަލުތައް ހުއްޓުވަން އެ ފަދަ ބާރުވެރިކަން ދީގެން ތަހުގީގު ކުރުމާއި ނިޔާ އިއްވާނެ ހާއްސަ ތަނެއް ގާއިމު ކުރަން ކެރޭވަރުގެ މީހަކު ނުވަތަ ބަޔަކު ހޯދިގެން ނޫނީ މިއަދު ދިމާވެގެން އުޅޭ މައްސަލައިން ނިކުމެވޭނެ މަގެއް ނުފެނެ އެވެ.

ސާބިތު ނުހިފޭ ވާހަކަ ދެއްކުން ކަމަށް ބަލާނެ މިންގަނޑުތައް ކަނޑައަޅައި އެ ކަންކަން ބަލައި ތަހުގީގު ކުރާނެ ތަނަކާއި އެ ފަދަ މައްސަލަތަކަށް އިންސާފު ގާއިމް ކުރާނެ ހާއްސަ އިދާރާއެއް އުފައްދާ އެ ދެ ތަނަކީ އެއް ކުލައިން ޖަރީވެފައިވާ ބަޔަކޫ ތިބޭ ތަންތަނަށް ނުހަދާ އަދި އެ ދެ ތަނަށް ބޭނުންވާ މީހުން ހޮވުމާއި ވަކި ކުރުމަކީ ސީދާ ރައްޔިތުންގެ ވޯޓަކުން ކުރާ ކަމެއްގެ ގޮތުގައި ހަމަޖައްސައިގެން ނޫނީ ސާބިތު ނުހިފޭ ވާހަކަ ދެއްކުން ކޮންޓްރޯލެއް ނުވާނެ އެވެ. 

ސުވާލަކީ އެ ވަރު ބާރެއް ދީގެން އެ ފަދަ މައްސަލަތައް ތަހުގީގު ކުރާނެ ތަނަކާއި އެ ފަދަ މައްސަލަތައް ބަލާ ނިޔާ ކަނޑައަޅާނެ އުފައްދަން ނުކެރިގެން އުޅެނީ ކީއްތޯ އެވެ. އިސްލާމީ މި މުޖުތަމައުގައި އެ ނުބައި އަމަލުތައް ހުއްޓުވަން އެ ފަދަ ބާރުވެރިކަން ދީގެން ތަހުގީގު ކުރުމާއި ނިޔާ އިއްވާނެ ހާއްސަ ތަނެއް ގާއިމު ކުރަން ކެރޭވަރުގެ މީހަކު ނުވަތަ ބަޔަކު ހޯދިގެން ނޫނީ މިއަދު ދިމާވެގެން އުޅޭ މައްސަލައިން ނިކުމެވޭނެ މަގެއް ނުފެނެ އެވެ.

0%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް