މިކަމަށްޓަކައި ބަންޑާރަކޮށީ އޮޑިޓޯރިއަމުގައި ބޭއްވި ހާއްސަ ރަސްމިއްޔާތުގައި، ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑޮކްޓަރ މުހައްމަދު މުއިއްޒު ދެއްވާ ހާއްސަ ސިޓީފުޅު، ބްރިގޭޑިއަރ ޖެނެރަލް ރިޓަޔާޑް އަހުމަދު ނަޝީދުއާ ހަވާލުކޮށްދެއްވީ ދިފާއީ ވަޒީރު، އޮނަރަބަލް މުހައްމަދު އައްސާން މައުމޫނެވެ.

މި ރަސްމިއްޔާތުގައި، އެމްއެންޑީއެފުން ދެއްވާ ސިޓީފުޅާއި އިހްލާސްތެރި ހިދުމަތް ރަމްޒުކޮށްދޭ ޑެކަރޭޝަން ބޯޑު، ބްރިގޭޑިއަރ ޖެނެރަލް ރިޓަޔާޑް އަހްމަދު ނަޝީދުއާ ހަވާލުކޮށްދެއްވީ ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީ އެވެ. އަދި ރިޓަޔާމަންޓްގެ ރަމްޒީ ކާޑު، ބްރިގޭޑިއާ ޖެނެރަލް ރިޓަޔަރޑް އަހްމަދު ނަޝީދުއާ ހަވާލުކޮށްދެއްވީ ވައިސް ޗީފް އޮފް ޑިފެންސް ފޯސް، ބްރިގޭޑިއާ ޖެނެރަލް އަހުމަދު އިޔާޒް އެވެ.

ބްރިގޭޑިއާ ޖެނެރަލް އަހުމަދު ނަޝީދު ސިފައިންގެ ހިދުމަތުން ޝަރަފުވެރިކަމާ އެކު ރިޓަޔާކުރެއްވި އިރު ހުންނެވީ ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް ގެ ޑައިރެކްޓަރ ޖެނެރަލް އަދި އޯޑްނަންސް ސަރވިސްގެ ކޮމާންޑާގެ މަގާމުގަ އެވެ.

ބްރިގޭޑިއާ ޖެނެރަލް ރިޓަޔަރޑް އަޙްމަދު ނަޝީދުގެ ދިގު އަސްކަރީ ހިދުމަތުގައި، ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް ގެ ޑައިރެކްޓަރު ޖެނެރަލްގެ މަގާމް، ޑައިރެކްޓަރޭޓް އޮފް ލޮޖިސްޓިކްސް ގެ ޕްރިންސިޕަލް ޑައިރެކްޓަރގެ މަގާމް، އޯޑްނަންސް ސާވިސްގެ ކޮމާންޑާގެ މަގާމާއި ކޮމާންޑިން އޮފިސާގެ މަގާމް، ކްއާޓާ މާސްޓާ ސާވިސްގެ ކޮމާންޑިން އޮފިސާގެ މަގާމް، ސްޕެޝަލް ޕްރޮޓެކްޝަން ގްރޫޕްގެ ކޮމާންޑިން އޮފިސާގެ މަޤާމް، ޓްރާންސްޕޯޓް ސާވިސްގެ ކޮމާންޑިން އޮފިސާގެ މަގާމް، ސަޕްލައި ޔުނިޓުގެ ކޮމާންޑިން އޮފިސާގެ މަގާމާއި އޮފިސާ ކޮމާންޑިންގެ މަގާމާއި އޮފިސަ ކޮމާންޑިންގެ އެހީތެރިޔާގެ މަގާމު ވަނީ އަދާކުރައްވާފައެވެ.

މި ރަސްމިއްޔާތުގައި ބްރިގޭޑިއާ ޖެނެރަލް އަހްމަދު ނަޝީދުގެ 37 އަހަރުގެ ސިފައިންގެ ހިދުމަތުގެ މައްޗަށް ތައްޔާރުކޮށްފައިވާ ވީޑިއޯ ރިޕޯޓެއް ހުށަހެޅުމުގެ އިތުރުން، ބްރިގޭޑިއާ ޖެނެރަލް އަހްމަދު ނަޝީދުގެ އަސްކަރީ ހިދުމަތުގެ ސައިޓޭޝަންއެއް އިއްވެވި އެވެ.

މި ރަސްމިއްޔާތުގައި، އެމްއެންޑީއެފްގެ ޖެނެރަލް އޮފިސަރުންނާއި، ޔުނިޓްތަކުގެ ކޮމާންޑަރުންނާއި، އޮފިސަރުންނާއި، ވޮރަންޓް އޮފިސަރުންނާއި، ކޮމާންޑް ސާޖަންޓް މޭޖަރުން އަދި ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް  އަދި އޯޑްނަންސް ސާވިސްގެ ސިފައިން ބައިވެރިވެލެއްވި އެވެ.