މިނިސްޓަރު މިހެން ވިދާޅުވީ، 40 ވަނަ ފުލުހުންގެ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވުމަށްފަހު ދެއްކެވި ވާހަކަފުޅުގަ އެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، ފުލުހުންގެ ހިދުމަތަކީ ގައުމެއްގެ ކުރިއެރުމަށް ކޮންމެހެން ބޭނުންވާ އަސާސީ ރުކުންތައް ދެމެހެއްޓުމުގައި އިސް ދައުރެއް އަދާކުރާ މުއައްސަސާއެކެވެ. މީގެ އިތުރުން، ގައުމުގެ ސަލާމަތާއި ރައްކާތެރިކަން ކަށަވަރުކުރުމާއި، މުޖުތަމައުގެ ހަމަޖެހުން ގާއިމުކޮށް ދެމެހެއްޓުމުގެ މަތިވެރި ޒިންމާ ފުލުހުންގެ އިދާރާއާ އިން ނަގަން ޖެހޭ ކަމަށް މިނިސްޓަރު ވިދާޅުވިއެ ވެ.
މި ރަސްމިއްޔާތުގައި ބައިވެރިވި ދަސްވެނިންނަށް މަރުހަބާ ކިޔައި، މިނިސްޓަރު ވިދާޅުވީ، މި ޒަމާނުގައި ފުލުހުންގެ މަގާމުގައި ތެދުވެރިކަމާއެކު މަސައްކަތްކުރުމަކީ ގިނަގުނަ ގޮންޖެހުންތަކެއް ކުރިމަތިވާނެ ކަމެއްކަމުގަ އެވެ. އަދި ކަދި ކޮންމެ ފުލުހެއްގެ ވެސް އަމާޒަކަށް ވާންޖެހޭނީ ތެދުވެރިކަމާއި އިހްލާސްތެރިކަމާއެކު މަސައްކަތްކުރުން ކަމަށާއި، އޯގާތެރިކަމާއި އަދަބުވެރިކަމާއެކު ރައްޔިތުންނަށް ހިދުމަތް ފޯރުކޮށްދިނުން ކަމުގައި މިނިސްޓަރު ވިދާލުވި އެވެ.
ފުލުހުންގެ ހިދުމަތުގައި ގައުމަށް ހިދުމަތްކުރުމަކީ ލުއިފަސޭހަ ކަމެއް ނޫންކަން ފާހަގަކުރައްވަމުން، މިނިސްޓަރު ވިދާޅުވީ މިއީ ހިތްވަރާއި ކެރުމާއެކު، ގައުމަށް ކުރާ ލޯބީގެ އިތުރުން ދިވެހި ރައްޔިތުންނަށް ހިދުމަތްކުރުމުގެ ހާއްސަ ޖޯޝެއް ހުރެގެން ކުރެވޭނެ ކަމެއް ކަމަށެވެ. މީގެ އިތުރުން، އަމިއްލަ ދަރިފުޅު ފުލުހުންގެ ހިދުމަތަށް ތައްޔާރުކުރުމަށްޓަކައި ދުރަށް ފޮނުވައި، ކޯސް ފުރިހަމަކުރުވުމަކީ ބެލެނިވެރިއަކަށް ގައުމަށްޓަކައި އަދާކުރެވޭ އަގުހުރި ގައުމީ ހިދުމަތެއްގެ ގޮތުގައިވެސް މިނިސްޓަރު ފާހަގަކުރެއްވި އެވެ.
ފުލުހުންގެ އަސާސީ ތަމްރީނު ފުރިހަމަކޮށް ނިންމާ ދުވަހަކީ ހަނދާނުން ފިލައިނުދާނެ ހާއްސަ ދުވަހަކަށް ވާނެ ކަމަށާއި، މި ދުވަހަކީ ގައުމަށް ހިދުމަތްކުރުމަށް އަޒުމް ކަނޑައަޅައި، އާ ހަޔާތަކަށް މަގުފަހިކުރާ ދުވަހެއްގެ ގޮތުގައިވެސް މިނިސްޓަރު ވަނީ ވިދާލުވެފަ އެވެ.
