ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހަޅުއްވާފައިވާ ބިލާ މެދު ނޫސްވެރިންނާއި މީޑިއާ ކައުންސިލާއި ޖާނަލިސްޓްސް އެސޯސިއޭޝަން އަދި ބޭރުގެ ގިނަ ޖަމިއްޔާތަކަކުން ކަންބޮޑުވުން ފާޅުކޮށްފައިވާ ވަނިކޮށް، އެ ބިލް މަޖިލީހުން ވަނީ ބަލައިގެންފަ އެވެ.
ބިލާ ގުޅޭގޮތުން ކޮމިޓީގައި ވާހަކަދައްކަވަމުން މީޑިއާ ކައުންސިލްގެ ރައީސް ހުސައިން ސަގީފު ވިދާޅުވީ، ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ހުށަހެޅުއްވި މި ބިލުގެ ޑްރާފްޓިން މަރުހަލާގައި ކައުންސިލާއި ނޫސްވެރިންނާއި ކަމާގުޅުންހުރި އިދާރާތަކާ މަޝްވަރާނުކުރައްވާ ކަމަށާއި، ބިލު ހުށަހެޅުއްވީ އެކަށޭނަ ދިރާސާއެއް ކުރުމެއް ނެތި ކަމަށެވެ.
ދޮގު ވާހަކަ ފެތުރުމާއި މީހުންގެ އަބުރަށް އުނިކަން އަންނަ ގޮތަށް ވާހަކަތައް ލިޔެފައި ހުންނަނީ ނޫހެއްގެ ގޮތުގައި ރަޖިސްޓްރީނުކުރާ ވެބްސައިޓްތަކެއްގައި ކަމަށާއި ވެބްސައިޓް ޑައުންކުރި ނަމަވެސް ވީޕީއެން އާއި އިންޓަނޭޝަނަލް ހޮސްޓިން ބޭނުންކޮށްގެން އެ ސައިޓްތައް ހިންގާނެ ކަމަށް ސަގީފު ވިދާޅުވި އެވެ.
އޭނާ ވިދާޅުވީ މި ހުރިހާ ކަމަކަށް ބެލި ނަމަވެސް ބިލުގައި ހުރީ ތަންފީޒުނުކުރެވޭނެ ވަރުގެ ކަންކަން ކަމަށެވެ.
ބިލާ ގުޅޭގޮތުން ސަގީފު އިތުރަށް ވިދާޅުވީ، ބޭރުގެ ކަމާގުޅުންހުރި ޖަމިއްޔާ ޖަމާއަތްތަކުން ލަފާދިނީ ބިލު އަނބުރާ ގެންގޮސް، ނޫސްވެރިންނާއި ކަމާގުޅުންހުރި އެންމެހާ ފަރާތްތަކާ މަޝްވަރާކުރުމަށް ފަހު ފުރިހަމަ ބިލެއް އަލުން ހުށަހެޅުމަށް ކަމަށެވެ.
މަޖިލީހަށް މިހާރު ހުށަހަޅާފައިވާ ބިލު ބޭރުކޮށްލަން ބައިނަލްއަގުވާމީ 20 އަށްވުރެ ގިނަ ޖަމިއްޔާއިން ގޮވާލާފައިވާކަން ވެސް މީޑިއާ ކައުންސިލްގެ މެންބަރު ނަހުދާ ފާހަގަކުރެއްވި އެވެ.
އޭނާގެ އިތުރުން ވެސް މިއަދުގެ ކޮމިޓީގައި ވާހަކަދެއްކެވި މީޑިއާ ކައުންސިލުގެ ހުރިހާ މެންބަރުން ވެސް ގޮވައިލީ މިހާރު ހުށަހަޅާފައިވާ ބިލު މަޖިލީހުން ބޭރުކޮށްލުމަށެވެ. އަދި އެ ބިލަށް އިސްލާހެއް ހުށަހެޅުމުގެ ބަދަލުގައި އެ ބިލާ މެދު އަމަލު ކުރަން ފެންނަ ގޮތެއް ބިލަށް ހިޔާލު ހުށަހެޅުމުގެ މުއްދަތުގައި ކޮމިޓީއަށް ލިޔުމުން ފޮނުވާނެ ކަމަށް ވެސް މީޑިއާ ކައުންސިލުގެ މެންބަރުން ވިދާޅުވި އެވެ.
މިހާރު ހުށަހަޅާފައި އޮތް މީޑިއާ ބިލު ފާސްކޮށް ބިލު ތަސްދީގުކޮށްފިނަމަ، ވަކިވަކި ނޫސްވެރިން 5،000 ރުފިޔާއާއި 25،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭއިރު މީޑިއާތައް 100،000 ރުފިޔާއިން ޖޫރިމަނާކުރެ ވެއެވެ.
މީގެ އިތުރުން، އެ ބިލުގެ ދަށުން އުފައްދާ މީޑިއާ ރެގިއުލޭޓަރީ ކޮމިޝަނަށް ހުށަހެޅޭ މައްސަލައެއް އެއްކޮށް ބަލައި ނުނިމެނީސް މީޑިއާތަކުގެ ރަޖިސްޓްރީ ބާތިލުކޮށް ނޫސްތައް ހުއްޓުވާލުމުގެ ބާރު ވެސް އާ ގާނޫނާ އެކު އުފައްދާ ކޮމިޝަނަށް ލިބޭނެއެވެ. އަދި، އެ ކޮމިޝަނަށް ތިން މެންބަރުން އައްޔަން ކޮށް, ކޮމިޝަންގެ ރައީސް ކަނޑައެޅުމުގެ ބާރު ދީފައިވަނީ ވެސް ރައީސްޖުމްހޫރިއްޔާއަށެވެ
