ނޫސްވެރިން ދޮގު ފަތުރައިގެން ނުވާނެ ކަމަށާއި، ތެދު މައުލޫމާތު ފެތުރުމަށް ގަވާއިދުތަކެއް ހެދުމަށް ބިރުގަންނާކަށް ނުޖެހޭނެ ކަމަށް، ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު އިބުރާހިމް މުހައްމަދު ވިދާޅުވެއްޖެއެވެ.
Advertisement
މީޑިއާ ބިލާ ގުޅިގެން ނޫސްވެރިންގެ ފަރާތުން ކަންބޮޑުވުން ފާޅުކުރަމުންދާ ދަނޑިވަޅެއްގައި، ދައުލަތުގެ މީޑިއާ މެދުވެރިކުރައްވައި މިކަން ހާމަކުރައްވަމުން މެންބަރު އިބުރާހިމް ވިދާޅުވީ، ރަޖިސްޓްރީކޮށްގެން ގަވާއިދުގެ ތެރެއިން މައުލޫމާތު ފަތުރާ ބަޔަކީ ތެދު ހަދާ ބަޔަކަށް ވާން ޖެހޭނެ ކަމަށެވެ.
އިބުރާހިމް މުހައްމަދު ވިދާޅުވީ، "ގާނޫނުތަކާއި ގަވާއިދުތައް ހަދަނީ ކަންކަން ރެގިއުލޭޓުކޮށް، އަމާންކަން ގާއިމު ކުރުމަށް،" ކަމަށެވެ. އަދި އިންސާނުންގެ އަބުރު ހިމާޔަތް ކުރުމަކީ އިސްލާމް ދީނުގެ އެންމެ މުހިއްމު އެއް އަސާސް ކަމަށާއި، ޤާނޫނުއަސާސީ ބިނާވެފައި އޮތީވެސް އިސްލާމް ދީން ހިމާޔަތް ކުރުމަށް ކަމަށް މެންބަރު ފާހަގަކުރެއްވިއެވެ.
ރައްޔިތެއްގެ އަބުރު ގެއްލިއްޖެއްޔާ އެމީހާއަކީ އެއްވެސް މީހަކަށް ނުވާނެތީ، އަބުރު ހިމާޔަތްކޮށްގެން އުޅެން ޖެހޭނެ ކަމަށް އޭނާ ވިދާޅުވިއެވެ.
މީޑިއާ ކޮމިޝަނަށް އައްޔަނުކުރާ މީހުން ގާނޫނުގެ ބޭނުން ނަހަމަ ގޮތުގައި ހިފާނެ ކަމުގެ ބިރަށްޓަކައި ޤާނޫނެއް ނުހަދައި ބޭއްވުމަކީ ފަހުން އޭގެ ގެއްލުން މާ ބޮޑުވާނެ ކަމެއް ކަމަށް މެންބަރު އިބުރާހިމް މުހައްމަދު ވިދާޅުވިއެވެ.
މުވައްސަސާއެއް ރަޖިސްޓަރީކޮށްގެން ދޮގު ފަތުރަން ނުވާނެ ކަމަށާއި، އެކަހަލަ ކަމަކަށް ފުރުސަތު ނުދިނުމަށްޓަކައި އެއްކުރަން ޖެހޭ މާއްދާއެއް އެކުރުމަކުން އެކަމުގައި ގޯސްކަމެއް ނެތް ކަމަށް އޭނާ ވިދާޅުވިއެވެ.
ޑިމޮކްރެޓިކް ޤައުމުތަކުގައިވެސް މީޑިއާތަކަށް ނުދެއްކޭ ޒާތުގެ ވާހަކަ ހުންނަ ކަމަށްވެސް މެންބަރު އިބުރާހިމް ވިދާޅުވިއެވެ.
