އެކްސްގައި ކުރެއްވި ޕޯސްޓެއްގައި އިމްރާން ވިދާޅުވީ ސަރުކާރު ހަމަމަގުން ކައްސާލާފައިވާކަމަށެވެ. އެހެންކަމުން ސަރުކާރު ޖަވާބުދާރީ ކުރުވުމަށް ޕީއެންއެފް އާއި އެމްޑީޕީ އަދި އެހެން ސިޔާސީ ޕާޓީ ތަކާއެކު އަދާލަތު ޕާޓީއަށް މަސައްކަތް ކުރެވޭނެކަމަށް އިމްރާން ވިދާޅުވިއެވެ.
ކޮންމެ ސަރުކާރެއް އޮތަސް އިދިކޮޅުގައި ތިބޭ ޕާޓީތައް ސަރުކާރު ޓްރެކުން ކައްސާލާ ކަމަށްވާނަމަ އެވާހަކަ ދައްކަން ޖެހޭނެކަމަށް އިމްރާން ވިދާޅުވިއެވެ. އަދި ރައީސް ޔާމީން ވިދާޅުވި ފަދައިން އެއީ ޕާޓީތަކުގެ ޒިންމާއެއްކަމަށާއި ސިޔާސީ ޕާޓީ އުފައްދާފައި އެޕާޓީތަކަށް މަތި ކޮށްފައި އޮތް ޒިންމާއެއް އެބައޮތްކަން އިންރާން ފާހަގަކުރެއްވިއެވެ.
އިމްރާން މިހެން ވިދާޅުވެފައި މިވަނީ ސަރުކާރު ހަމައިން ކައްސާލާ ނަމަ އިދިކޮޅު ހުރިހާ ޕާޓީއަކަށް އެ ވާހަކަދައްކަން އެއް ޕްލެޓްފޯމަކަށް އާދެވޭނެ ކަމަށް ކުރީގެ ރައީސް، ޔާމީން އަބްދުލްގައްޔޫމް މިދިޔަ ބުރާސްފަތި ދުވަހުގެރޭ ވިދާޅުވެފައި ވަނިކޮށެވެ. ޕީއެންއެފްގެ އޮފީހުގައި ވާހަކަ ދައްކަވަމުން ޔާމީން ވިދާޅުވީ ސަރުކާރުން ކުރާ ގޯސް ކަންކަމުގެ ވާހަކަދައްކަން އިދިކޮޅު އެމްޑީޕީއަށާއި އަދާލަތަށްވެސް ހިތްވަރު ދެއްވާ ކަމަށެވެ.
