އެ ޖަމާއަތުގެ ޗީފާ ހަވާލާދީ ތަރުޖަމާނު ރަވީނާ ޝަމްދަސަނި ނެރުއްވި ބަޔާނުގައި ވިދާޅުވީ މީޑިއާ ރެގިއުލޭޓްކުރާ ގާނޫނުގައި، ރާއްޖެއިން ސޮއިކޮށްފައިވާ މަދަނީ އަދި ސިޔާސީ ހައްގުތަކާ ބެހޭ ބައިނަލްއަގުވާމީ މުއާހަދާއާ ފުށުއަރާ އުސޫލުތަކެއް އެބަހުރި ކަމަށެވެ.
ސަރުކާރު ފަހަތުގައި އޮވެގެން އަމިއްލަ މެންބަރެއް ލައްވާ މަޖިލީހަށް ހުށަހަޅައި އޮގަސްޓު 27، ގައި ބިލު ބަލައިގަތުމާއެކު ވެސް ބައިނަލްއަގުވާމީ އިދާރާތަކުގެ ކަންބޮޑުވުން ފާޅުކުރި އެވެ. މިއަދު އދ. ގެ ހައި ކޮމިޝަނާ ފޯ ހިއުމަން ރައިޓްސްގެ އޮފީހުން ވެސް ވަނީ މިހާރު އަމަލުކުރަމުން އަންނަ ގާނޫނަކީ ހިޔާލު ފާޅުކުރުމާއި މީޑިއާގެ މިނިވަންކަމަށް އޮތް ނުރައްކަލެއްގެ ގޮތުގައި ސިފަކޮށްފަ އެވެ.
މި ގާނޫނާ ގުޅޭ ގޮތުން ޔޫރަޕިއަން ޔޫނިއަން، އެމެރިކާ އަދި އިނގިރޭސިވިލާތުން ވެސް ކަންބޮޑުވުން ފާޅުކޮށްފައިވެ އެވެ. އޭގެ އިތުރުން ބޭރުގެ ޖަމިއްޔާތަކުން ވެސް މި ކަންބޮޑުވުންތަކުގެ އަޑު އުފުލި އެވެ.
މި ގާނޫނު މަޖިލީހުން ފާސްކޮށް ތަސްދީގުކުރީ ނޫސްވެރިންގެ ބޮޑު ކަންބޮޑުވުންތަކެއްގެ ތެރޭގައެވެ. ނޫސްވެރިންގެ މައިގަނޑު ކަންބޮޑުވުމަކީ ސަރުކާރުގެ ނިޒާމުގެ ތެރެއިން މީޑިއާ ވަރަށް ބޮޑަށް ރެގިއުލޭޓް ކުރެވޭ ގޮތަށް އޮތުމާއި، ކޮމިޝަނުގެ 3 މެމްބަރުން މަޖިލީހުން އައްޔަންކުރާ ގޮތަށް ހުރުމުގެ އިތުރުން ހުރިހާ މެމްބަރުން މަޖިލީހަށް ވަކިކުރެވޭ ގޮތަށް އޮތުމެވެ.
