މި މަޝްރޫއުތަކުގެ އަމަލީ މަސައްކަތް ފަށާފައިވަނީ ރައީސް ޑރ. މުހައްމަދު މުއިއްޒު ތ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
ގާދިއްފުއްޓަކީ ބޯހިޔާވަހިކަމުގެ މައްސަލަ ދިމާވެފައިވާ ރަށެކެވެ. މިއަދު ސޮއިކުރެވުނު ބިން ހިއްކުމުގެ މަޝްރޫއު މަސައްކަތް ނިމުމާއި އެކު ރަށުން ގޯތިދޭނެ އިތުރު ޖާގަ ތަނަވަސް ވެގެންދާނެ އެވެ. އޭގެ އިތުރުން ސިނާއީ މަސައްކަތް ކުރުމަށް ވެސް ރަށުން ޖާގަ ތަނަވަސް ވެގެންދާނެ ކަމަށް އެމްޓީސީސީން ވަނީ ބުނެފަ އެވެ.
ގޮނޑުދޮށް ހިމާޔަތްކުރުމުގެ މަސައްކަތް ނިމުމާއެކު އުދައެރުމާއި ރަށް ގިރުމުގެ މައްސަލަ ހައްލުވެގެންދާނެ އެވެ.
ރައީސް މުއިއްޒު މިއަދު ގާދިއްފުށި ރައްޔިތުންނާއި ބައްދަލުކުރައްވާ ވިދާޅުވީ، ރަށުގެ ބިން ހިއްކުމުގެ ބޭނުމަކީ ރަށުގައި ބޯހިޔާވަހިކަމާ އަދި އިގުތިސޯދީ ފުރުސަތުތަކަށް މަގުފަހިކޮށްދިނުންކަމަށެވެ. އެގޮތުން ތ. އަތޮޅުގައި ބިން ހިއްކުން ކުރިއަށްދާ ރަށްތަކުގެ މަޝްރޫޢުތަކާ އެކުއެކީގައި ގާދިއްފުށިގެ ބިން ހިއްކައިދިނުމުގެ މަސައްކަތް ގެންދަވާނެކަމަށެވެ.
މި ދަތުރުފުޅުގައި ރަށުގައި ފެށިގެން ދިޔަ ހެލްތް ސެންޓަރ އެކްސްޓެންޝަން އިމާރާތުގެ މަސައްކަތަކާ، ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތްވެސް އަވަސްކޮށްދެއްވާނެކަމަށް ވިދާޅުވި އެވެ. ރައީސް ވިދާޅުވީ ރަށުގެ ކައުންސިލްގެ އާ އިމާރާތްވެސް ޗައިނާ ސަރުކާރުގެ އެހީގައި ލިބިފަވާ މަޝްރޫއުގައި ކުރިއަށްގެންދިއުމަށް ނިންމާފަވާކަމަށެވެ.
މީގެއިތުރުން ކުޅިވަރު ވަސީލަތް ތަރައްޤީކުރުމުގެ މަސައްކަތުގައި، ރަށުގައި ފުޓުބޯޅަ ދަނޑުގެ ޓާފް އާކޮށްދީ، ފެންސްޖެހުމާއެކު އިތުރަށް ތަރައްގީކޮށްދެއްވާނެކަމަށެވެ.
އަދި ރަށުގެ ކުނީގެ މައްސަލައަށް ހައްލެއް ގެންނަންޖެހިފަވާތީ، އެ މަސައްކަތްވެސް ވެމްކޯގެ އެހީތެރިކަމާއެކު ރަށުގައި ކުރިއަށްގެންދަވާނެކަމަށް ވިދާޅުވި އެވެ. އަދި ރަށުގެ ކަރަންޓުގެ މައްސަލަވެސް އަންނަ ރޯދަމަހުގެ ކުރިން ހައްލުކޮށްދޭނެކަމަށް ފެނައިން ވިދާޅުވެފަވެ އެވެ.
