އިހުސާން ވިދާޅުވީ އެންމު ފުރަތަމަ މި ޑިވައިސް ފުލުހުން ބޭނުންކޮށްފައިވަނީ 2013 ވަނަ އަހަރު ކަމުގަ އެވެ.
އެ ޑިވައިސް ފުރަތަމަ ބެހެއްޓިފައިވަނީ ފުލުހުންގެ ސައުންޑް ވެހިކަލްގައި ކަމަށާއި އެ ވެހިކަލް ފުލުހުން ބޭނުން ކުރަމުން ދިޔައީ ސްޕެޝަލް އޮޕަރޭޝަންތަކުގައި ކަމަށް އިހުސާން ފާހަގަ ކުރެއްވި އެވެ.
މިނިސްޓަރު މައުލޫމާތު ދެއްވި ގޮތުގައި އެމްޑީޕީ މުޒާހަރާގައި ބޭނުން ކުރެވުން މޮޑަލްގެ ލާރްޑް އެންމެ ފުރަތަމަ ބޭނުން ކުރެވިފައިވަނީ 2023 ވަނަ އަހަރު ޕަބްލިކް އޯޑާރް އޮޕަރޭޝަނެއްގެ ތެރެއިން ކަމުގަ އެވެ.
މުޒާހަރާ ރޫޅާލުމަށް ފުލުހުން ބޭނުންކުރި ސޮނިކް ވެޕަން އިތުރަށް ބޭނުން ނުކުރަން ގޮވާލައި އޮންލައިން ޕެޓިޝަނެއްގައި ސޮއިކުރަން ވެސް ވަނީ ފަށާފައި އެވެ.
އެއީ މުޒާހަރާތައް ކޮންޓްރޯލް ކުރުމަށް ފުލުހުންނާއި ސިފައިން ބޭނުންކުރާ ނޮން-ލީތަލް ހަތިޔާރެކެވެ. އެ ހަތިޔާރު ބޭނުންކުރުމުގެ ސަބަބުން މުޒާހަރާގެ ބައިވެރިންނާއި މުޒާހަރާކުރި ސަރަހައްދުގެ ގެތަކުގައި ދިރިއުޅޭ އާއިލާތަކާއި ކުޑަކުދިންނަށް އޭގެ އަސަރު ކުރި ކަމަށް ވެސް ޕެޓިޝަންގައި ބުނެފައިވެ އެވެ.
ސޮނިކް ވެޕަންއަކީ ލޯންގު ރޭންޖް އެކޮސްޓިކް ޑިވައިޒް ނުވަތަ އެލްއާރުއޭޑީ ބޭނުންކޮށްގެން އެއް ރިދަމަކަށް އުފައްދާ ގަދަ އަޑެކެވެ.
މި އާލާތަކީ މާ ކައިރީގައި ބަހައްޓައިގެން ބޭނުންކޮށްފި ނަމަ ސިއްހަތަށް ވަރަށް ބޮޑަށް ގެއްލުން ލިބޭނެ އެއްޗެކެވެ. ރޭގައި ފުލުހުން މި އާލާތް ބޭނުންކުރީ އާންމުންނާއި ފުލުހުންނާ ދެމެދުގައި ޝީލްޑް ޖަހައިފައި ހުރި ހިސާބުގައި ތިބެގެންނެވެ. މީގެން އިވޭ އަޑުގެ ސަބަބުން ކަންފަތަށް ވަރަށް ބޮޑަށް ތަދުވެ، ދާއިމަށް ބީރުވުމުގެ ބިރު ވެސް އޮވެ އެވެ.
ނަމަވެސް ފުލުހުން ނެރުނު ބަޔާނުގައި ބުނީ އެއްވުން ހުއްޓުވުމުގައި ފުލުހުން ބޭނުންކޮށްފައިވަނީ ފުލުހުންގެ ހިދުމަތުގެ ގާނޫނުގެ ދަށުން ހަދާފައިވާ، ހަތިޔާރު ގެންގުޅުމާއި ބޭނުންކުރުމުގެ ގަވާއިދާއި ފުލުހުންނަށް ލިބިދީފައިވާ ބާރާއި އިހުތިޔާރުގެ ބޭނުންކުރުމުގައި އަމަލުކުރާނެ ގޮތުގެ ގަވާއިދުގައި ހުއްދަކޮށްފައިވާ ބާރުތައް ކަމަށެވެ.
