"ސްކޫބާ" ނަމަކަށް ކިޔާ އެ ދޯނި އަޑިއަށް ގޮސްފައިވަނީ އަލިހުރަސް ކަނޑު ސަރަހައްދުގައެވެ.
އެމްއެންޑީއެފުން ބުނީ، މި ދޯނި އަޑިއަށް ގޮސްފައިވަނީ އަލިހުރަސް ކަނޑުން 12 ނޯޓިކަލް މޭލު އިރުމަތިން ކަމަށެވެ. ދޯނީގެ ބައިތަކާއި އެހެނިހެން ތަކެތި ރަސްދޫގެ އިރުމައްޗަށްވާ ގޮތަށް އަލިހުރަސް ކަނޑުތެރޭގައި އޮޔާދާ ކަމުގެ މައުލޫމާތު ލިބިފައިވާ ކަމަށް ވެސް އެމްއެންޑީއެފުން ބުންޏެވެ.
މި ހާދިސާއާ ގުޅިގެން އަލިހުރަސް ކަނޑާއި އެ ސަރަހައްދުން ދަތުރުކުރާ އުޅަނދުފަހަރުތައް ސަމާލުވުމަށް އެމްއެންޑީއެފުން ވަނީ އިލްތިމާސްކޮށްފައެވެ. ހާއްސަކޮށް، ރޭގަނޑު އެ ސަރަހައްދުން ދަތުރުކުރުމުގައި އިތުރު ސަމާލުކަމެއް ދިނުމަށް އެ އިދާރާއިން ވަނީ އެދިފައެވެ.
