ޖުމުލަ ހަތް މީހުންނާ އެކު ދަތުރުކުރި ކޮޅުވެއްޓިން ހަތަރު މީހުން ވަނީ ސަލާމަތްކޮށްފަ އެވެ. އަދި، ތިން މީހުން ގެއްލިގެން ފުލުހުންނާއި ސިފައިން އަންނަނީ އެ މީހުން ހޯދުމުގެ މަސައްކަތްކުރަމުންނެވެ.
މީގެ ކުރިން ސިފައިން ވަނީ އޭގެ ތެރެއިން އެކަކު ފެނިފައިވާ ކަމަށް ބުނެފަ އެވެ. އެއީ، ގއ. ދާންދޫ، ސަރުސޫނުގެ، 38 އަހަރުގެ އަހުމަދު ޝިފާނެވެ. އޭނާ ފެނުނީ މަރުވެފައި އޮއްވަ އެވެ.
ސިފައިން ވަނީ ހޯދަމުން އައި އިތުރު މީހެއްގެ ހަށިގަނޑު ވެސް ކަނޑު އަޑިން ފެނިފައިވާ ކަމަށް ބުނެފަ އެވެ.
މިހާދިސާއާ ގުޅޭ ގޮތުން އެމްއެންޑީއެފުން ކުރިން ބުނި ގޮތުގައި ލޭންޑިން ކްރާފްޓް ދަތުރުކުރަމުން ދިޔައީ ރީތިރަށް ރިސޯޓަށެވެ. ނަމަވެސް އެމްއެންޑީއެފުން ފަހުން ބުނެފައިވާ ގޮތުން އެ ލޭންޑިން ކްރާފްޓް ދަތުރުކުރީ ރީތިރަށް ރިސޯޓު ކައިރީގައި އޮންނަ ކ. އެރިޔަދޫއަށެވެ.
މި ދުވަސްވަރު ރާއްޖޭގެ އެކި ހިސާބުތަކަށް އަންނަނީ ވިއްސާރަ ކުރަމުންނެވެ. އަދި، ކަނޑުތައް ގަދަވުމުގެ ސަބަބުން ކޮންމެހެން ކުރަންޖެހޭ ދަތުރެއް ނޫނީ ނުކުރަން ސިފައިންނާއި ފުލުހުން ވެސް ވަނީ އިލްތިމާސްކޮށްފަ އެވެ.
