މި ތިން ބޭފުޅުންނަށް ރުހުން ދިނުމަށް މިއަދު މަޖިލީހުގައި ނެގި ވޯޓުގައި ބައިވެރިވި 63 މެންބަރުންގެ ތެރެއިން 54 މެންބަރަކު ވަނީ ރުހުން ދެއްވާފަ އެވެ.
މިނިވަން މުއައްސަސާތަކުގެ ކޮމިޓީން ދިރާސާކުރި އަށް ބޭފުޅުންގެ ތެރެއިން އެންމެ މަތިން މާކްސް ލިބުނު ތިން ބޭފުޅުންގެ ގޮތުގައި މަޖިލީހުގެ ތަޅުމަށް ފޮނުވާފައިވަނީ ފަރުސަތު، ސަފާ އަދި ސަރާހަތު އެވެ. މި ތިން ބޭފުޅުންގެ ތެރެއިން ފަރުސަތުއަށް 90.50 ޕަސަންޓު ލިބިފައިވާއިރު، ސަފާއަށް 88.88 ޕަސަންޓު އަދި ސަރާހަތަށް 87.88 ޕަސަންޓު ލިބިފައިވެ އެވެ. މި ތިން ބޭފުޅުން އައްޔަންކުރުމާ ދެކޮޅަށް ނުވަ މެންބަރަކު ވޯޓު ދެއްވި އެވެ.
އާ ގާނޫނުގެ ދަށުން އުފައްދާފައިވާ މީޑިއާ ކޮމިޝަންގައި ހިމެނެނީ ޖުމްލަ ހަތް މެންބަރުންނެވެ. އޭގެ ތެރޭގައި ހިމެނެނީ މީޑިއާތައް ތަމްސީލުކުރާ ހަތަރު މެންބަރުންނާއި ރައްޔިތުންގެ މަޖިލީހުން ކަނޑައަޅާ ތިން މެންބަރުންނެވެ. މީޑިއާތައް ތަމްސީލުކުރާ ހަތަރު މަގާމަށް މެންބަރުން ހޮވާފައިވަނީ ވާދަވެރި އިންތިހާބަކާ ނުލަ އެވެ. އެއީ އެ މަގާމުތަކަށް ކުރިމަތިލީ މެންބަރުންގެ އަދަދު، އިންތިހާބު ކުރަންޖެހޭ އަދަދާ އެއްވަރުވުމުންނެވެ.
