އޭނާ މަރުވީ ފުއްޕާމޭގެ ކެންސަރަށް ފަރުވާ ހޯއްދަވަމުން ގެންދަވަނިކޮށް ކަމަށް އޭނާގެ އާއިލާއިން ވަނީ ބުނެފައެވެ. ވިލްސަން އަކީ 1991 އިން 2001 އަށް ބީބީސީގެ ޓޮޕް ގިއާ ޕްރޮގްރާމްގައި މަސައްކަތް ކުރެއްވި ފަރާތެކެވެ.
ވިލްސަން އަކީ ޓޮޕް ގިއާގެ އިތުރުން ޗެނަލް 5 ގެ "ފިފްތް ގިއާ" ޕްރޮގްރާމް ވެސް ހުށަހަޅާދެއްވި މަޝްހޫރު ހުށަހެޅުންތެރިއެކެވެ. އޭނާގެ އަވަހާރަވުމާ ގުޅިގެން، ޓޮޕް ގިއާގައި އެކުގައި މަސައްކަތް ކުރެއްވި ޖެރެމީ ކްލާކްސަން އާއި ޖޭމްސް މޭ ވަނީ ހިތާމަ ފާޅުކުރައްވާފައެވެ. ކްލާކްސަން ވިދާޅުވީ ވިލްސަން އަކީ "ހަގީގަތުގައި ވެސް މަޖާ މިޒާޖެއްގެ ބޭފުޅެއް" ކަމަށެވެ. އަދި ޖޭމްސް މޭ ވިދާޅުވީ އޭނާ އަކީ "ވަރަށް ރަނގަޅު ބޭފުޅެއް" ކަމަށެވެ. ޖޭމްސް މޭ އަކީ 1990 ގެ އަހަރުތަކުގައި ކުޑަ ދުވަސްކޮޅަކަށް ވިލްސަން އާއެކު ޓޮޕް ގިއާގައި މަސައްކަތް ކުރެއްވި ފަރާތެކެވެ.
ލެސްޓާ އަށް އުފަން ވިލްސަން އަކީ ތިން ބޭފުޅުންގެ ބައްޕައެކެވެ. ޓީވީ ޝޯތައް ހުށަހެޅުއްވުމުގެ އިތުރުން، ފަހުގެ އަހަރުތަކުގައި އޭނާ މަސައްކަތް ކުރައްވާފައި ވަނީ ކެމްޕޭނަރެއްގެ ގޮތުގައާއި، އަދި ހާއްސަކޮށް އިލެކްޓްރިކް ވެހިކަލް (އީވީ) ތަކަށް ވަކާލާތު ކުރައްވާ ފަރާތެއްގެ ގޮތުގައެވެ. އޭނާގެ އާއިލާއިން ނެރުނު ބަޔާނުގައި ބުނީ، ވިލްސަން އަވަހާރަވީ ކެންސަރު ބަލީގައި ކުރު މުއްދަތަކަށް އާލާސްކަންފުޅާ އުޅުއްވުމަށް ފަހު ކަމަށެވެ.
