ފެރިދޫ ކައުންސިލް އިދާރާގައި މަސައްކަތްކުރި އިދާރީ މުވައްޒަފަކަށް، ޝާހު ޖިންސީ ފުރައްސާރަކުރިކަން މަދަނީ މިންގަނޑުން ސާބިތުވާކަމަށް ވަޒީފާއާބެހޭ ޓްރައިބިއުނަލުން ނިންމީ މިދިޔަ ސެޕްޓެންބަރު މަހުގެ 21 ވަނަ ދުވަހު އެވެ.
އެއާއެކު، އެލްޖީއޭއިން ވަނީ އިންކުއަރީއެއް ހަދައި، އެއަށް ޖަވާބުދާރީވުމަށް ޝާހުއަށް 7 ދުވަހުގެ މުއްދަތެއް ދިނުމަށްފަހު، އެ އިންކުއަރީން ފާހަގަވި ކަންކަން މިއަދު އާއްމުކޮށްފަ އެވެ. އެގޮތުން، އެ މައްސަލައާ ގުޅިގެން އެލްޖީއޭއީން ނެރުނު ބަޔާނެއްގައި ބުނީ، ޝާހުގެ މައްޗަށް ޖިންސީ ފުރައްސާރައިގެ މައްސަލަ ސާބިތުވާކަމަށް ކަނޑައެޅުމުން ގާނޫނުން ކައުންސިލްގެ ރައީސްގެ މައްޗަށް މަތިކޮށްފައިވާ ޒިންމާއާ ހިލާފުވެފައިވާކަން ކަށަވަރުވެފައިވާކަމަށާއި ލާމަރުކަޒީ ގާނޫނުގައި ކައުންސިލްގެ ތަސައްވުރު ކާމިޔާބުކަމާއެކު، ހާސިލްކުރަން އިހުލާސްތެރިކަމާއި ވަފާތެރިކަންމަތީގައި މަސައްކަތްކުރާ ބަޔަކަށްވުމާއި އަދި ކައުންސިލްގެ ހައިސިއްޔަތާއި ގަދަރު ދެމެހެއްޓުމުގެގޮތުން ހިފަހައްޓަންޖެހޭ ހަމަތަކާއި އުސޫލުތައް ހިފަހައްޓާ ބަޔަކަށް ވާންޖެހޭނެކަމަށް ބަޔާންކޮށްފައިވީނަމަވެސް، ޝާހުގެ ކިބައިން ފެނުނު އަމަލުތައް އެ މާއްދާއާ ހިލާފުވެފައިވާކަމަށެވެ.
މި މައްސަލައިގައި ވަޒީފާއާބެހޭ ޓްރައިބިއުނަލްއިން ކުރި ހުކުމުގައި ވަނީ، މައްސަލަ ހުށަހެޅި އެސިސްޓެންޓް ކައުންސިލް އޮފިސަރާއި ޝާހުގެ ފަރާތުން ހުށަހެޅި ލިޔުންތަކާއި ދެ ފަރާތުން ދެއްކި ވާހަކަތައް އަދި ހެކި ބަހަށް ބަލާއިރު، ޝާހު ޖިންސީ ފުރައްސާރަ ކޮށްފައިވާކަން މަދަނީ މިންގަނޑުން ސާބިތުވާ ކަމަށާއި އަދި އެސިސްޓެންޓް ކައުންސިލް އޮފިސަރާ މެދު، ފުރައްސާރައިގެ އެއްވެސް އަމަލެއް ތަކުރާރުނުކުރުމަށް ޝާހުގެ މައްޗަށް އަންގައި އަމުރު ކުރާކަމަށެވެ.
އެއާއެކު، އެލްޖީއޭގެ ބޯޑުން ބޭއްވި ބައްދަލުވުމުގައި ވަނީ މުސާރަ އާއި އިނާޔަތްތައް ނުލިބޭ ގޮތަށް ޝާހު ތިން މަސް ދުވަހަށް ސަސްޕެންޑުކުރަން ނިންމައިފަ އެވެ.
ޓްރައިބިއުނަލްގެ ނިންމުން އިސްތިއުނާފަށް ހުށަހެޅުމަށް 30 ދުވަހުގެ މުއްދަތެއް ދިން ނަމަވެސް، އެ މުއްދަތުގައި އިސްމާއީލް ޝާހު މައްސަލަ އިސްތިއުނާފު ކޮށްފައެއް ނުވެ އެވެ.
