ސްރީލަންކާގެ ސަރުކާރުން ވަނީ މި ދަތި ވަގުތު ދިވެހި ސަރުކާރުން ދިން އެހީއަށް ޝުކުރު އަދާކޮށްފައެވެ.
މި ތޫފާނުގެ ސަބަބުން ލިބުނު ގެއްލުންތަކުން އަރައިގަތުމަށް އެހީވުމުގެ ގޮތުން ދިވެހި ސަރުކާރުން ވަނީ 50،000 އެމެރިކާ ޑޮލަރުގެ ފައިސާގެ އެހީއަކާއި 25،000 މަސްދަޅު ކޭސް ސްރީލަންކާއަށް ހަދިޔާކުރަން ނިންމާފައެވެ. ފޮރިން މިނިސްޓްރީން ނެރުނު ބަޔާނެއްގައި ބުނީ، މި އެހީއަކީ ސްރީލަންކާގެ ރައްޔިތުންނަށް ދިމާވެފައިވާ ދަތިތަކަށް ލުޔެއް ދިނުމުގެ މަގްސަދުގައި ފޯރުކޮށްދޭ އެހީއެއް ކަމަށެވެ.
ދިވެހި ސަރުކާރުގެ މި ނިންމުމަށް ޝުކުރު އަދާކޮށް ސްރީލަންކާގެ ސަރުކާރުން "އެކްސް" ގައި ކުރި ޕޯސްޓެއްގައި ބުނީ، މި އެހީއިން ދެ ގައުމުގެ ދެމެދުގައި އޮންނަ ވަރުގަދަ ގުޅުމާއި ރަހުމަތްތެރިކަން ރަމްޒުކޮށްދޭ ކަމަށެވެ. "ޑިޓްވާ" ތޫފާނުގެ ސަބަބުން ސްރީލަންކާއަށް ބޯކޮށް ވާރޭވެހި، އެތައް ބައެއްގެ ފުރާނަ ގެއްލިފައިވާއިރު، މިއީ ސުނާމީ ކާރިސާއަށް ފަހު އެ ގައުމަށް ދިމާވި އެންމެ ނުރައްކާތެރި ހާދިސާގެ ގޮތުގައި ވަނީ ފާހަގަކުރެވިފައެވެ.
