ބޭ އޮފް ބެންގަލްގައި އުފެދުނު ތޫފާން "ޑިޓުވާ"ގައި ލަންކާއަށް ބޯކޮށް ވާރޭވެހި ފެންބޮޑުވުމުގެ ސަބަބުން މިހާތަނަށް 123އަށް ވުރެ ގިނަ މީހުން މަރުވެފައިވާ ކަމަށް އެ ގައުމުގެ ޑިޒާސްޓާ މެނޭޖްމަންޓް ސެންޓަރުން ބުނެ އެވެ. އަދި ބިންގަނޑު ކަނޑައިގެން ދިއުމުގެ ހާދިސާތަކުގައި 130 މީހަކު ގެއްލިފައިވާއިރު، 10 މީހަކަށް އަނިޔާވެފައިވެ އެވެ.
ބަންޑާރަނައިކަ އިންޓަނޭޝަނަލް އެއާޕޯޓުން މާލެ އަދި ގަމަށް މިއަދު އަންނަން ހަމަޖެހިފައިވާ ސްރީލަންކަން އެއާލައިންސް ފްލައިޓްތައް ވެސް ކެންސަލްވެފައިވާއިރު، އޭގައި ދަތުރު ކުރަން ހަމަޖެހިފައިވާ ދިވެހިން މި ވަގުތު ތިބީ އެއާޕޯޓްގައި ތާށިވެފަ އެވެ. ފްލައިޓް ކެންސަލްކުރި ކަން އެނގުނީ ގިނަ ބަޔަކު އެއާޕޯޓަށް ދިޔަ ފަހުންނެވެ.
އޭގެ ތެރެއިން ގިނަ މީހުންނަށް އިތުރު ފްލައިޓެއް އަދި ހަމަޖެހިފައިވާ ނުވާ ކަމަށް މައުލޫމާތު ލިބެ އެވެ. ރާއްޖެ އައުމަށް ކޮލަމްބޯގައި ޓްރާންސިޓްވި ގިނަ ޓޫރިސްޓުން ވެސް އެ ގައުމުގައި ތާށިވެފައިވާ ކަމަށް މައުލޫމާތު ލިބެ އެވެ.
މޫސުން ގޯސްވެ، ފްލައިޓްތައް ކެންސަލް ކުރުމާއި ގުޅިގެން ނުފުރި ތިބި ފަރާތްތަކުގެ ވިސާގެ ފީއާއި، ވިސާ ހަމަވެ އިތުރަށް މަޑުކުރަންޖެހޭ މުއްދަތުގައި އަރާ ޖޫރިމަނާ ފީތައް މާފު ކުރުމަށް ސްރީލަންކާގެ އިމިގްރޭޝަނުން ނިންމާފައިވާ ކަމަށް ދިވެހި އެމްބަސީން މިއަދު ވަނީ ބުނެފަ އެވެ.
ކުރު މުއްދަތަކަށް ދަތުރުކުރާ ފަތުރުވެރިންނާއި، ބިޒްނަސް ވިސާއާއި ރެސިޑެންސް ވިސާ ފުރިހަމަ ކުރުމަށް 7 ދުވަހުގެ މުހުލަތެއް ދިނުމަށްވެސް ސްރީލަންކާގެ އިމިގްރޭޝަނުން ވަނީ ނިންމަވާފަ އެވެ. އަދި މި ހިދުމަތްތައް ސްރީލަންކާގެ އިމިގްރޭޝަންގެ ވެބްސައިޓު މެދުވެރިކޮށް ލިބޭނެ އިންތިޒާމް ވަނީ ހަމަޖައްސަވާފަ އެވެ.
ލަންކާގައި ހުންނަ ދިވެހި ހައި ކޮމިޝަނުން ބުނީ މިހާރު އެ އެންމެންގެ ހާލު ގާތުން ބަލަމުންދާ ކަމަށެވެ. އަދި އެ މީހުންގެ ހާލަތު ދެނެގަނެ އެހީވުމުގެ މަސައްކަތް ފަށައިފައިވާ ކަމަށް ހައިކޮމިޝަނުން ބުންޏެވެ.
ލަންކާއަކީ ގިނަ އަދަދެއްގެ ދިވެހީން ދިރިއުޅޭ އަދި ބޭސްފަރުވާއަށާއި ކިޔެވުމަށާއި ޗުއްޓީ ހޭދަކުރަން ވެސް ދިވެހީން އާންމުކޮށް ގޮސް އުޅޭ ގައުމެކެވެ.
އެހެންކަމުން ލަންކާގައި ހުންނަ ދިވެހި ރާއްޖޭގެ ހައި ކޮމިޝަނުން ވަނީ ލަންކާއަށް ކޮންމެހެން ކުރަންޖެހޭ ދަތުރުތައް ނޫން އެހެން ދަތުރުތައް ނުކުރުމަށް އެދިފައެވެ. އަދި ބިންތިރި ސަރަޙައްދާއި މޫދާއި ކޯރު ކައިރި ސަރަޙައްދުގައި ދިރިއުޅޭ މީހުން، ލަންކާގެ ކަމާ ގުޅުންހުރި އިދާރާތަކުން ދޭ އިންޒާރަށް ސަމާލުވެ، ރައްކާތެރި ހިސާބުތަކަށް ދިއުމަށް އަންގާފައެވެ.
ލަންކާގައި ހުންނަ ރާއްޖޭގެ އެމްބަސީގެ ހޮޓްލައިން ނަންބަރަކީ, 09476991666 އެވެ.
އާންމު ދިރިއުޅުމަށް އަސަރު ކުރުމުގެ ސަބަބުން ލަންކާ ސަރުކާރުން ވަނީ އެ ގައުމުގެ ސްކޫލްތަކާއި އޮފީސްތައް ވެސް ބަންދުކޮށްފަ އެވެ. އޭގެއިތުރުން ޓްރެއިން ސްޓޭޝަންތައް ވެސް ވަނީ ބަންދުކޮށްފަ އެވެ.
