އެމްޑީޕީ ތެރޭގައި ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހުގެ ފެކްޝަނެއް އުފެދިފައިވާއިރު، ދާދިފަހުން އެމްޑީޕީގެ ޗެއާޕާސަން ކަމުގައި ހުންނެވި ފައްޔާޒު އިސްމާއިލް ވެސް ވަނީ މަގާމުން އިސްތިއުފާ ދެއްވާފަ އެވެ.
އެކްސްގައި ކުރެއްވި ޕޯސްޓެއްގައި މިއަދު ނަޝީދު ވިދާޅުވީ އެމްޑީޕީ މިވަގުތު ތަޖުރިބާ ކުރަމުންދަނީ އުނދަގޫ ދުވަސްތަކެއް ކަމަށާއި ނަމަވެސް މި ހާލަތުން އެމްޑީޕީ އަރައިގަންނާނެ ކަމާމެދު ޝައްކު ނުކުރައްވާ ކަމަށެވެ.
އެއާ އެކު ނަޝީދު ވަނީ މޯޓަރުގަޑުބަޑުގެ ތާރީހުން، އޭރުގެ ކެބިނެޓުން ދެއްކި އެއްބައިވަންތަކަމުން މިސާލެއް ވެސް މިއަދު ނެންގެވި އެވެ.
މޯޓަރުގަޑުބަޑުގެ ތާރީހީ ހާދިސާ އާ ކުރައްވަމުން ނަޝީދު ފާހަގަކުރެއްވި ގޮތުގައި މުހައްމަދު އަމީން ވިދާޅުވީ، އެންމެ މުހިންމީ ކެބިނެޓުގެ "ޔުނިޓީ" އެވެ.
އެމްޑީޕީގެ ވަގުތީ ޗެއާޕާސަނަކު ހޮވަން ބޭއްވި ގައުމީ މަޖިލީހުގެ ބައްދަލުވުމެއް ރޭ ބޭއްވި ނަމަވެސް އެ ބައްދަލުވުން ހޫނުވެ އެންމެފަހުން ވަނީ ޖަލްސާ ހުއްޓާލާފަ އެވެ.
ގައުމީ މަޖިލީހުގެ ރޭގެ ޖަލްސާގައި ޗެއާޕާސަނަކަށް ތިން މެންބަރެއްގެ ނަން ހުށަހަޅައި ތާއީދު ލިބުނެ އެވެ. އެއީ ރައްޔިތުންގެ މަޖިލީހުގެ ކުރީގެ ރައީސް މުހައްމަދު އަސްލަމް އާއި އަބްދުﷲ ވަހީދު (ދިއްދޫ ވައްޑެ) އާއި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ އެވެ.
މީގެތެރެއިން ވަހީދު ވަގުތީ ޗެއާޕާސަންކަމަށް އައްޔަންކުރަން ފެނޭތޯ ގައުމީ މަޖިލީހުގެ މެންބަރުންގެ ތެރޭ ވޯޓަށް އެހުމުން ލިބުނީ 47 ވޯޓެވެ. ނަމަވެސް ފެންނަކަމަށް ކަނޑައަޅަން 48 ވޯޓު ބޭނުންވެ އެވެ. އެހެންވެ ރިޔާސަތުން ނިންމީ އޭނާ މަގާމަށް އައްޔަން ކުރަން ބޭނުންވާ އަދަދަށް ވޯޓު ނުލިބުނު ކަމަށެވެ.
ދެން ހުށަހަޅާފައި ހުރިނަންތަކަށް ވޯޓަށް އަހަން ރިޔާސަތުން ތައްޔާރުވި ނަމަވެސް ގައުމީ މަޖިލީހުގެ ގިނަ އަދަދެއްގެ މެމްބަރުން ނިކުތުމުން ނިޒާމު ގެއްލިފައިވާ ކަމަށް ބުނެ ވަނީ ޖަލްސާ ހުއްޓާލާފަ އެވެ.
ސޯލިހުގެ ޓީމުން މިހާރު އެމްޑީޕީ ހިންގަމުންދާއިރު އިދިކޮޅު ޕާޓީއެއްގެ ހައިސިއްޔަތުން އެމްޑީޕީގެ ހިންގުންތެރިކަން ދަށްކަމުގެ ފާޑުކިޔުން ވަރަށް ބޮޑެވެ. އަމިއްލަފުޅު ގެކޮޅުގެ ހޯލެއްގައި ކުރީގެ ރައީސް އަބްދުالله ޔާމީން ކުރައްވާވަރާ ގާތަށް ވެސް އެމްޑީޕީއަށް މަސައްކަތް ނުކުރެވޭކަމުގެ ފާޑުކިޔުން ވަރަށް ބޮޑެވެ.
އިންތިހާބުތަކުން އެމްޑީޕީއަށް ބޮޑެތި ނާކާމިޔާބީތަކާ ކުރިމަތިވާއިރު އެ ޕާޓީގެ ގައުމީ މަޖިލީހާއި އެހެން ބައެއް އިސް މަގާމުތަކުގައި ވެސް ކޮރަޕްޝަންގެ ތުހުމަތުތައް ކުރެވޭ ބޭފުޅުން އަދިވެސް އެބަތިއްބެވި އެވެ. އޭގެ ތެރޭގައި ނިމިދިޔަ އެ ޕާޓީގެ ވެރިކަމުގައި ސަރުކާރުގެ އިސް މަގާމުތަކުގައި ތިއްބެވި ބޭފުޅުންނާއި އެ ޕާޓީގެ އޭރުގެ ބައެއް މަޖިލިސް މެންބަރުން ހިމެނެ އެވެ. އެންމެ ފަހުން އޮޑިޓް އޮފީހުން ނެރުނު އޮޑިޓާ ޖެނެރަލްގެ އޮޑިޓް ރިޕޯޓްގައި ވެސް އެފަދަ މައްސަލަތައް ފާހަގަކޮށްފައި ވެއެވެ.
