ޕީއެންސީގެ ފަރާތުން 300,000 ރުފިޔާގެ ޗެކް ހަވާލުކުރައްވާފައިވަނީ އެޕާޓީގެ ޕީޖީ ގްރޫޕްގެ ބައެއް އިސް ބޭފުޅުންނާއި އެ ޕާޓީގެ މެންބަރުންނެވެ.
ޗެކް ހަދިޔާ ކުރައްމުން މަޖިލީހުގެ ރައީސް އަބްދުއްރަހީމް ޢަބްދުﷲ ވިދާޅުވީ ލަންކާއަކީ ރާއްޖެއާ ޒަމާނުއްސުރެ ވަރަށް ގާތް ގައުމެއް ކަމަށެވެ. އެހެންކަމުން މި ޓެލެތޯނަށް ވީހާވެސް ގިނަ މީހުން ފައިސާ ހަދިޔާކުރުމަށް މަޖިލީހުގެ ރައީސް އެދިވަޑައިގެންފައިވެ އެވެ.
ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ވިދާޅުވީ ސްރީލަންކާ އަކީ ހަމަ އެކަނި އަވަށްޓެރި ގައުމެއްގެ އިތުރުން ވަރަށް ގިނަ ދިވެހި އާއިލާތައް ދިރިއުޅޭ ގައުމެއް ކަމަށެވެ. ލަންކާ އަށް ކުރިމަތިވި ހިތާމައިގާ ދިވެހިން ބައިވެރިވަނީ ދިވެހިންނަށް ކުރިމަތިވި ހިތާމައެއްގެ ގޮތޮގައި ކަމަށް ވެސް އޭނާ ވިދާޅުވި އެވެ.
ސްރީ ލަންކާ އަށް އެރި ތޫފާނުގައި ލިބުނު ގެއްލުންތަކުން އަރައިގަތުމުގައި ދިވެހިންގެ ފަރާތުން އެހީވުމަށް ޕީއެސްއެމުން އިންތިޒާމު ކޮށްގެން ރާއްޖޭގެ ބައެއް މީޑިއާތަކާ ގުޅިގެން މިހާރު ކުރިއަށްގެންދާ "ސިލޯނާ އެކު ދިވެހިން" ޓެލެތޯންގައި މިހާތަނަށް 1.4 މިލިޔަނަށް ވުރެ ގިނަ ރުފިޔާ ވަނީ މިއަދުގެ މެންދުރާ ހަމައަށް ވަނީ ލިބިފަ އެވެ.
މިއަދު ހެނދުނު 9:00 ގައި ފެށި ޓެލެތޯން މިރޭ މެންދަމު 1:00 ގެ ނިޔަލަށް ކުރިއަށް ގެންދާނެ އެވެ.
މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ވަނީ ބަހައްޓައިފަ އެވެ. ދިވެހި ރުފިޔާއިން ނަމަ ޖަމާކުރާނީ 7730000796107 އެކައުންޓަށެވެ. އަދި ޑޮލަރުން ނަމަ ޖަމާކުރާނީ 7730000796106 އަށެވެ.
ޕީއެސްއެމުން ބުނީ މި ފަންޑަށް ލިބޭ ފައިސާ ބަލަހައްޓައި ދެފުށް ފެންނަ ގޮތަކަށް ކުރިއަށް ގެންދިޔުމަށް މިނިވަން އޮޑިޓް ފާމަކާ ވެސް ވަނީ ހަވާލުކޮށްފަ އެވެ.
ހާލުގައި ޖެހިފައިވާ ލަންކާއަށް އެހީވުމަށް، 50،000 ޑޮލަރާއި 25،000 މަސްދަޅު ކޭސް ހަދިޔާ ކުރުމަށް ދިވެހި ސަރުކާރުން ވަނީ ނިންމާފަ އެވެ.
ބޭ އޮފް ބެންގަލްގައި އުފެދުނު މި ތޫފާނުގައި ލަންކާއަށް ބޯކޮށް ވާރޭވެހި ފެންބޮޑުވުމުގެ ސަބަބުން މިހާތަނަށް 159 މީހުން މަރުވެ، 200އަށް ވުރެ ގިނަ މީހުން ގެއްލިފައިވާ ކަމަށް ކަމަށް އެ ގައުމުގެ ޑިޒާސްޓާ މެނޭޖްމަންޓް ސެންޓަރުން ބުނެ އެވެ. އަދި އެތައް ލައްކަ ބަޔަކަށް ވަނީ ވިއްސާރައިގެ ސަބަބުން އަސަރުކޮށްފަ އެވެ.
ލަންކާއަށް ވިއްސާރަކުރާތާ ހަފްތާއެއް ފަހުން އެރި ތޫނާފާ އެކު ބޮޑެތި ގެއްލުންތަކެއް ވެފައި ވާއިރު ތޫފާނު މިހާރު ވަނީ ލަންކާއާ ދުރަށްޖެހި އިންޑިއާގެ ޓެމިލްނާޑޫއާ ކައިރިވެފަ އެވެ. ތޫފާނުގައި ވައި ގަދަވެ ބޯކޮށް ވާރޭ ވެހޭނެ ކަމަށް ލަފާކޮށް އިންޑިއާގެ އެކި ސަރަހައްދުތަކުން ވެސް ވަނީ ތައްޔާރީ ހާލަތަށް އައިސްފަ އެވެ.
