ރައްޔިތުންގެ މަޖިލީހުގެ އިދާރާއިން ކުރި އިއުލާނެއްގައި ބުނެފައިވަނީ މި ބިލަށް އެއްވެސް ފަރާތެއްގެ ހިޔާލެއް ނުވަތަ ކޮމެންޓެއް އޮތްނަމަ، 17 ޑިސެންބަރު 2025 ވާ ބުދަ ދުވަހުގެ މެންދުރު 14:00 ގެ ކުރިން ކޮމެޓީގެ އީމެއިލް އެޑްރެހަށް ނުވަތަ ލިޔުމުން މަޖިލީހަށް ހުށަހެޅޭނެ ކަމަށެވެ.
ފުލުހުންނަށް ބޮޑެތި ބާރުތަކެއް ބިލުން ލިބޭ:
އާ ބިލުގައި ދަތުރުފަތުރުގެ ގާނޫނާ ހިލާފުވާ ފަރާތްތަކާ މެދު ފިޔަވަޅު އެޅުމަށް ފުލުހުންނަށް ބޮޑެތި ބާރުތަކެއް ދިނުމަށް ވަނީ ހިމަނާފައެވެ. އެގޮތުން ގަވައިދާ ހިލާފުވެގެން ކުރާ ޖޫރިމަނާގެ އަދަދު 5,000 ރުފިޔާއަށްވުރެ މައްޗަށް ހިނގައްޖެނަމަ، އެ ފައިސާ ދައްކައި ހަލާސްކުރަންދެން އެ އުޅަނދެއްގައި "ބޫޓް" އެޅުވުމުގެ ބާރު ފުލުހުންނަށް ލިބިގެންވެއެވެ.
އިދިކޮޅުގެ ކަންބޮޑުވުން ބިލާ މެދު އެބައޮތް:
މި ބިލާ ގުޅިގެން ރައްޔިތުންގެ މަޖިލީހުގެ މެންބަރުންގެ މެދުގައި ބަހުސްކުރެވެމުންދާއިރު، ބައެއް މާއްދާތަކާމެދު ކަންބޮޑުވުން ވެސް ވަނީ ފާޅުކޮށްފައެވެ. ހާއްސަކޮށް އެހެން ގާނޫނަކާ ހިލާފުވުމުން ވެސް ލައިސަންސް ހިފެހެއްޓިދާނެ ކަމަށް ބަޔާންކޮށްފައިވާ މާއްދާއާ ގުޅިގެން ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވަނީ ކަންބޮޑުވުން ފާޅުކުރައްވާފައެވެ. އޭނާ ވިދާޅުވީ މުޒާހަރާކުރުން ނުވަތަ ހަޅުތާލުކުރުން ފަދަ ހައްގުތަކުގެ ބޭނުންކުރާ ހާލަތްތަކުގައި، ދަތުރުފަތުރުގެ ގާނޫނުގެ ތެރެއިން ލައިސަންސް ބާތިލްކުރުމުގެ ޖާގަ އޮވެގެން ނުވާނެ ކަމަށެވެ.
