ފުލުހުން ބުނި ގޮތުގައި މި އުޅަނދުތައް ނެގުމުގެ މަސައްކަތް ފަށާނީ މި މަހުގެ ހަ ވަނަ ދުވަހުން ފެށިގެން ކަމަށާއި، މިކަން ކުރިއަށް ގެންދާނީ ކަމާ ގުޅުންހުރި އެހެނިހެން އިދާރާތަކާ ވެސް ގުޅިގެންނެވެ.
މި އޮޕަރޭޝަންގައި މައިގަނޑު ގޮތެއްގައި ނެގުމަށް ހަމަޖެހިފައިވަނީ ހުޅުމާލޭގެ ހުސްބިންތަކާއި އާންމު ދަތުރުފަތުރަށް ބޭނުންކުރާ މަގުތަކުގައި ގަވާއިދާ ހިލާފަށް ބަހައްޓާފައި ހުންނަ އުޅަނދުތަކާއި، ރަޖިސްޓްރީ ނުކޮށް ހުންނަ އުޅަނދުތަކެވެ. މީގެ އިތުރުން މާލެ ސަރަހައްދު ނުވަތަ އޭ ޒޯން ފިޔަވައި، އެހެން ޒޯންތަކަށް ރަޖިސްޓްރީކޮށްފައި ހުރެ ހުޅުމާލޭގައި ޕާކުކޮށްފައިވާ އުޅަނދުތައް ވެސް މި އޮޕަރޭޝަންގެ ތެރެއިން ޓޯކުރާނެ ކަމަށް ފުލުހުން ވަނީ މައުލޫމާތު ދީފައެވެ.
އުޅަނދު ޓޯކުރުމުގައާއި އެ އުޅަނދެއް ބަހައްޓާފައި ހުންނަ މުއްދަތުގައި ލިބޭ އެއްވެސް ގެއްލުމަކަށް ފުލުހުންގެ ހިދުމަތުން ޒިންމާނުވާނެ ކަމަށާއި، ޓޯވކުރުމަށް ފަހު އެ އުޅަނދެއް އެހެން ތަނަކަށް ގެންދިއުމުގެ ޒިންމާ ނަގަންޖެހޭނީ ވެރިފަރާތުން ކަމަށް ވެސް ފުލުހުން ބުނެއެވެ.
މި މަސައްކަތް ފުލުހުން ފެށުމުގެ ކުރިން، އަމިއްލައަށް އުޅަނދުތައް ނެގުމަށް ވަނީ ފުރުސަތު ދީފައެވެ. އެގޮތުން މި މަހުގެ ފަސް ވަނަ ދުވަހުގެ ރޭގަނޑު 23:30 ގެ ކުރިން، އެފަދަ އުޅަނދުތައް އެ ސަރަހައްދުތަކުން ނެގުމަށް ފުލުހުން ވަނީ އުޅަނދުތަކުގެ ވެރިފަރާތްތަކަށް އިލްތިމާސްކޮށްފައެވެ.
