ވަހީދު ސަސްޕެންޑްކޮށް އެލްޖީއޭއިން ބުނީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ބައެއް މާއްދާތަކާއި ކައުންސިލްގެ ރައީސް ހިލާފުވެފައިވާ ކަމަށާއި، ސުލޫކީ މިންގަނޑާއި ހިލާފަށް ހޯރަފުށީ ކައުންސިލްގެ މެމްބަރުންގެ އަމަލުތައް ބަހައްޓާފަައިވާ ކަމަށެވެ. އެކަމުގެ ގެއްލުން ކައުންސިލާއި ލާމަރުކަޒީ ނިޒާމަށް ލިބިފައިވާ ކަމަށެވެ.
އެލްޖީއޭއިން މިއަދު ވަނީ، ވަހީދު މަގާމުގެ މަސްއޫލިއްޔަތުތަކުން މުސާރަ ނުލިބޭގޮތަށް ވަގުތީގޮތުން ދުރުކުރުމާއެކު، ދެން ތިބި ކައުންސިލަރުންނަށް ނަސޭހަތްތެރިވާން ވެސް ނިންމާފަ އެވެ. އަދި މި މައްސަލާގައި ޖަވާބުދާރީވާން ކައުންސިލުގެ މެމްބަރުންނަށް ހަތް ދުވަހުގެ މުއްދަތެއް ދީފައިވާނެ ކަމަށް ވެސް އެލްޖީއޭން ބުންޏެވެ.
މީގެ އިތުރުން، އިންކުއަރީ އެލްޖީއޭގެ ރިޕޯޓުގައި ފާހަގަކޮށްފައިވާ ވަކިވަކި މައްސަލަތަކާ ގުޅިގެން އެ ރިޕޯޓުގައި ލަފާދީފައިވާ ގޮތަށް ކަންކަން ކުރުމަށާއި ކައުންސިލް އިދާރާގެ ސެކްރެޓަރީ ޖެނެރަލާއި އިދާރީ އެހެން މުވައްޒަފެއްގެ އިހުމާލެއްވާ ނަމަ އެކަންކަމަށް ޒިންމާވާ މުވައްޒަފަށް ފިޔަވަޅު އެޅުމަށް އެ މައްސަލައަކާއި ގުޅުންހުރި، ދައުލަތުގެ އިދާރާތަކަށް ހުށަހެޅުމަށް ވެސް އެލްޖޭއޭން މިއަދު ވަނީ ނިންމާފަ އެވެ.
ހޯރަފުށީ ކައުންސިލުން، ދަ ހޯކްސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކަށް ކޮރަޕްޝަނަށް މަގުފައިވާގޮތަށް 5000 އަކަފޫޓުގެ ބިމެއް ދީފައިވާކަމަށް ބުނެ އަމިއްލަ ފަރާތަކުން ހުށަހަޅާފައިވާ ޝަކުވާއަކާއެކު ޖުމްލަ އަށް މައްސަލައެއް އެލްޖޭއޭއިން މިފަހުން ބަލާފައިވެ އެވެ.
ކައުންސިލްގެ ރައީސް ހިމެނޭހެން ހޯރަފުށީ ކައުންސިލުގައި ތިބެނީ 7 މެމްބަރުންނެވެ. މިއީ އެމްޑީޕީގެ ފުރިހަމަ މެޖޯރިޓީ އޮންނަ ކައުންސިލެކެވެ.
