އެފްޑީސީއިން ބުނީ ދޫކުރުމަށް މިހާރު ތާވަލުކޮށްފަވާ ތާރީހުތަކާ އެއްގޮތަށް ތަޅުދަނޑިތައް ހަވާލުކުރުމުގެ މަސައްކަތް ކުރިއަށްދާކަމަށެވެ.
އެގޮތުން އަމާން އުދަރެސް ޓަވަރު 11، 12، 15، އަދި 16 ވަނަ ޓަވަރުގައި ހިމެނޭ އެޕާޓްމަންޓްތަކުގެ ތަޅުދަނޑިތަައް ފްލެޓް ލިބުނު ފަރާތްތަކާ ހަވާލުކުރުމުގެ މަސައްކަތް މިހާރު ފެށިފާއިވާކަމަށާއި، 13 ވަނަ ޓަވަރު ހަވާލުކުރުމުގެ މަސައްކަތް މިއަދު ފަށާނެކަމަށްވެސް އެ ކުންފުނިން ވިދާޅުވިއެވެ.
އެފްޑީސީން ބުނީ، މި ފްލެޓްތައް ހަވާލުކުރުމުގެ މަސައްކަތް ކޮންމެ ދުވަހެއްގެވެސް ހެނދުނު 9:30އިން މެންދުރު 3:30އަށް ކުރިއަށްދާކަމަށެވެ.
ފްލެޓްތައް ދޫކުރުމަށް ތާވަލުކޮށްފައިވާ ތާރީހާ އެއްގޮތަށް އެ މަސައްކަތް ކުރިއަށްދާނެކަމަށާއި، އަމާޒަކީ ވީހާވެސް އަވަހަކަށް މި ފްލެޓްތައް ދޫކުރުންކަމަށް ވިދާޅުވިއެވެ.
މީގެ ކުރިން އެފްޑީސީއިން ވަނީ ހުޅުމާލެ ދޭއް ގައި އިމާރާތް ކޮށްފައިވާ 17-18 ބުރީގެ 32 ޓަވަރުގައި 4،000 ފްލެޓްގެ މަސައްކަތް އަންނަނީ ކުރަމުންކަމުގަ އެވެ.
އޮގަސްޓުމަހުގެ ތެރޭގައި އެ ކޯޕަރޭޝަނުން ވަނީ، ޕޯޓަލް މެދުވެރިކޮށް، ފުލެޓުތައް ވެރިފަރާތާ ހަވާލުކުރަން ފަށާފަ އެވެ.
މި 4000 ފްލެޓްގެ ތެރެއިން ފުރަތަމަ ހަވާލު ކޮށްފައިވަނީ އަމާން އުދަރެސްގެ ޓަވަރު 14ގެ ފްލެޓްތަކެވެ.
އެފްޑީސީން އިމާރާތްކޮށްފައިވާ ފްލެޓްތަކުގެ ތެރެއިން ފުރަތަމަ ފްލެޓް ލިބުނު މީހާއަށް ފްލެޓްގެ ތަޅުދަނޑި ހަވާލުކޮށްދެއްވީ އެކަމަށްޓަކައި ބޭއްވި ރަސްމިއްޔާތެއްގައި އެފްޑީސީގެ މެނޭޖިން ޑިރެކްޓަރު ހަމްދާން ޝަކީލްއެވެ.
ފުރަތަމަ ހަވާލުކޮށްފައިވަނީ އަމާން އުދަރެސްގެ 14ވަނަ ޓަވަރުގެ ފްލެޓެކެވެ.
ފްލެޓްތައް ހަވާލުކުރާއިރު އެ ތަންތަނުގައި މީހުން ދިރިއުޅެން ބޭނުންވާ އަސާސީ ހިދުމަތްތައް ކަމަށްވާ, ފެނާއި ނަރުދާމާގެ އިތުރުން ކަރަންޓްގެ ހިދުމަތް ލިބެން ހުންނާނެ ކަމަށް އެފްޑީސީން ބުނެ އެވެ.
ރައީސް ސޯލިހު ސަރުކާރުގައި އިންޑިއާގެ ދެ ކުންފުންޏަކާ ހަވާލުކޮށްގެން ވަކިވަކިން ކުރިއަށް ގެންދާ އެ ދެ މަޝްރޫއުގައި ހިމެނެނީ ދެ ކޮޓަރީގެ ފްލެޓާއި ތިން ކޮޓަރީގެ ފްލެޓެވެ. ދެ ކޮޓަރީގެ އެޕާޓްމަންޓުތައް ދޫކުރަނީ 7،000ރ. އަށެވެ. އެ ތަންތަނުގެ މެއިންޓެނަންސް ފީގެ ގޮތުގައި 1،000ރ. އަދި ސެކިއުރިޓީ ޑިޕޮސިޓުގެ ގޮތުގައި ދައްކަން ހަމަޖައްސާފައިވަނީ 15،000ރ. އެވެ.
ތިން ކޮޓަރީގެ ތަންތަން ދޫކުރަން ނިންމާފައިވަނީ 9،500ރ. އަށެވެ. އެއީ މެއިންޓެނަންސް ފީގެ ގޮތުގައި 1،500ރ. އަދި ސެކިއުރިޓީ ޑިޕޮސިޓަށް 25،000ރ. އެވެ.
ސަރުކާރުން ފްލެޓް އެއްބަސްވުމުގައި ސޮއިކުރަމުން އަންނަނީ، ފްލެޓްތައް ނިމިފައިވާ ތަރުތީބުންނެވެ. އެފްޑީސީގެ އެންމެ ފަހުގެ ހިސާބުތަކުން އެނގޭ ގޮތުގައި މިހާތަނަށް ގާތްގަަނޑަކަށް 3،000 މީހުންނާ އެކު ވަނީ ސޮއިކޮށް ނިމިފަ އެވެ.
ގެދޮރުވެރިޔާ ސްކީމްގެ ދަށުން ފްލެޓްތައް ލިބޭ ކަމަށް ކުރީގެ ސަރުކާރުން އިއުލާނުކުރި ލިސްޓް ރިވިއުކޮށް، އޭގެ ތެރެއިން ޝަރުތު ހަމަވެ، ފްލެޓް ލިބޭ މީހުންގެ ލިސްޓެއް މި ސަރުކާރުން މިދިޔަ އެޕްރީލް މަހު ވަނީ އާންމުކޮށްފަ އެވެ. ނަމަވެސް ފުރަތަމަ ލިސްޓު އޮއްވާ ދެވަނަ ލިސްޓަކަށް ނުދެވޭނެ ކަމަށް ބުނެ ފާޅުކުރި ކަންބޮޑުވުންތަކާ ގުޅިގެން މި ސަރުކާރުން ނިންމީ ނޮވެމްބަރު، 2023 ގެ ލިސްޓަށް ފްލެޓް ދިނުމަށެވެ.
މީގެ އިތުރުން ގެދޮރުވެރިޔާ ފުލެޓުތައް ލިބުނު މީހުންގެ ހައްގުގައި މަސައްކަތް ކުރާ ފަހި ޔޫނިއަނުން ވަނީ 350 އެއްހައި ފްލެޓް، ހައުސިން މިނިސްޓްރީގެ މުވައްޒަފުންތަކެއް ކަމަށް ބުނާ ބަޔަކު އެކި މީސްމީހުންނަށް ގުޅައިގެން ވިއްކުމަށް މަސައްކަތްކުރަމުން އަންނަކަމަށް ތުހުމަތުކޮށްފަ އެވެ. ނަމަވެސް ހައުސިން މިނިސްޓްރީން ވަނީ އެ ތުހުމަތު ދޮގުކޮށްފަ އެވެ.
