"ޝާނިދާރް އޭ" ގެ ނަމުން ނަންދެވިފައިވާ މި އިންސާނާގެ ކަށިގަނޑުން ފެނުނު ހެކިތަކުން، އެޒަމާނުގެ އިންސާނުންގެ ދިރިއުޅުމާއި މަރުވި ގޮތާ ބެހޭގޮތުން އާ ތަފްސީލުތަކެއް ވަނީ ތިލަވެފަ އެވެ.
ސައިންސްވެރިންގެ ދިރާސާތަކުން ދައްކާ ގޮތުގައި "ޝާނިދާރް އޭ" ގެ ކޮނޑުކަށީގައި 15 މިލިމީޓަރުގެ ވަށް ލޯވަޅެއް ހުއްޓެވެ. މިއީ އޭނާގެ ހިތަށް އަމާޒުކޮށް އެއްލާފައިވާ ލަކުޑި ސްޕެއަރ އަކުން ލިބިފައިވާ އަނިޔާއެއްކަން ދިރާސާކުރި ފަރާތްތަކުން ވަނީ ކަށަވަރުކޮށްދީފަ އެވެ. މި ހަމަލާއަކީ އޭނާގެ މަރަށް މަގުފަހިވި މައިގަނޑު ސަބަބު ކަމަށް ބެލެވެ އެވެ.
މި ދިރާސާއިން އެނގުނު އެންމެ ފާހަގަކޮށްލެވޭ އަނެއް ކަމަކީ، މި އިންސާނާއަށް ކުރިން ލިބިފައިވާ ނުރައްކާތެރި އަދި ބޮޑެތި އަނިޔާތަކުން އޭނާ ސަލާމަތްވެ، ދިރިއުޅެފައިވާ ކަމެވެ. ސައިންސްވެރިން ބުނާ ގޮތުގައި އޭނާއަށް މިފަދަ ބޮޑެތި އަނިޔާތަކާއެކު ސަލާމަތުން ދިރިއުޅެވުނީ އޭނާ ނިސްބަތްވާ މުޖުތަމަޢުގެ ފަރާތުން ލިބުނު އޯގާތެރިކަމާއި އަޅާލުމުގެ ސަބަބުންނެވެ.
ކޭމްބްރިޖްގެ އާކިއޮލޮޖިސްޓުން ހާމަކުރި މި ހޯދުމަކީ އެންމެ ދުވަސްވީ އިންސާނުންގެ މުޖުތަމަޢުގައި އެކަކު އަނެކަކަށް އަޅާލުމާއި އެހީތެރިވުމުގެ ސަގާފަތް އޮތްކަން ސާބިތުކޮށްދޭ އަގުހުރި ހެއްކެކެވެ. މިއީ އޯގާތެރިކަމަކީ އިންސާނީ ތާރީޚުގެ އެންމެ ކުރީކޮޅުން ފެށިގެންވެސް އޮތް މުހިންމު ސިފައެއްކަން ހާމަކޮށްދޭ ދިރާސާއެކެވެ.
