ބިދޭސީންް ގަވައިދާ ހިލާފަށް ކުރާ ވިޔަފާރިތައް ރަޖިސްޓްރީކޮށްދޭ ދިވެހިންނަށް ހަރުކަށި ފިޔަވަޅު އަޅާނެކަމުގެ އިންޒާރު ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
Advertisement
ހޯމް މިނިސްޓްރީން ބާއްވާ ޕްރެސެއްގައި ވާހަކަ ދައްކަވަމުން މިނިސްޓަރު އިހްސާން ވިދާޅުވީ ގަވައިދާ ހިލާފަށް ކުރަމުން އަންނަ ވިޔަފާރިތައް ހޯދުމަށް ކުރަމުން އަންނަ މަސައްކަތުގެ ތެރެއިން މިދިޔަ ހަފްތާއެެއްގެ ތެރޭގައި 47 ވިޔަފާރި ބަންދުކޮށްފައިވާކަމަށެވެ.
މީގެތެރޭގައި ގިނައީ ދިވެހިންގެ ނަމުގައި ރަޖިސްޓްރީކޮށް ހިންގަމުން އަންނަ ވިޔަފާރިތައްކަމަށް ހޯމް މިނިސްޓަރު އިހްސާން ވިދާޅުވިއެވެ. މިގޮތަށް ހުރި ވިޔަފާރިތަކަށް ބަލާއިރުގައި އެތަން ރެޖިސްޓްރީކޮށްފައިވާ ދިވެހި މީހާއަށް އެތަނުގައި ކުރަނީ ކޮން ވިޔަފާރިއެއްކަންވެސް ނޭނގޭކަން އިހްސާން ފާހަގަކުރެއްވިއެވެ.
" ދައުލަތުގެ އިދާރާޔަކުން ނަގަންޖެހޭ ހުއްދަތަކެއް ނުނަގާ، ދައުލަތަށް ދައްކަންޖެހޭ ޓެކްސް ފައިސާ ނުދައްކާ މި ލިބޭ ލާރީގެ ބޮޑު ބައެއް ބިދޭސީ މީހާގެ އަމިއްލަ އެކައުންޓުން ރޯލްކުރަމުންދާކަން އަަޅގަނޑުމެންނަށް ފާހަގަކުރެވޭ." އިހްސާން ވިދާޅުވިއެވެ.
މިގޮތަށް މިކަން ކަން ކުރާނަމަ މިވަގުތުން ފެށިގެން މި ބަންދުކުރާ ތަންތަނާ އެކުއެކީގައި ދިވެހިންގެ ތެރެއިން ބިދޭސީން އެކްސްޕޮލެއިޓްކޮށް މިގޮތަށް ފާހަގަކުރެވޭ ފަރާތްތަކާއި ދޭތެރޭގައި މިހާރު ގާނޫނުގައިވާ ހަރުކަށި ފިޔަވަޅުތައް އަޅާނެކަމުގެ ހަރުކަށި އިންޒާރު ހޯމް މިނިސްޓަރު އިހްސާން ވިދާޅުވިއެވެ.
" އަޅުގަނޑު ހުރިހާ ދިވެހިންނަށް ނަސޭހަތްތެރިވަން އެބޭފުޅުންގެ ނަމުގައި ރެޖިސްޓްރީ ކުރެވިފަވާ، ދައުލަތުގެ އިދާރާތަކަށް އެއީ އެބޭފުޅުންގެ ވިޔަފާރުތައްކަމަށް ފެންނަ ވިޔަފާރިތައް ބިދޭސީންގެ އަތްމައްޗަށް ދޫކޮށް ނުލައްވާށޭ. އެ ފަރާތްތަކުން ރާއްޖޭގެ ގާނޫނާއި ހިލާފަށް އެތާނގާއި ކުރާ ކަންކަމުގެ ޒިންމާ ނަގަންވަންޖެހޭނީ ތި ދިވެހި ރެޖިސްޓްރީކުރެވިފައިވާ ފަރާތްތަކުން. އެހެންކަމުން މިގޮތަށް މިކަންކަން ނުކުރައްވާ މިހާރުވެސް މި ގޮތަށް ހެދިފައި ހުރި ސެޓަޕްތައް ވަގުތުން ބަންދުކުރައްވާ އެމީސް މީހުން ދައުލަތާއި އެ މައުލޫމާތުދީ ގަވައިދާ ހިލާފަށް އުޅޭ މީހުންގެ މައުލޫމާތައް ފޯރުކޮށްދިނުމަކީ އަޅުގަނޑުމެން އެދޭކަމެއް." ހޯމް މިނިސްޓަރު އިހްސާން ވިދާޅުވިއެވެ.
ގަވައިދާ ހިލާފަށް ހިންގާ ވިޔަފާރިތައް ރިޕޯޓްކުރަން ހުޅުވާލުމުން މިހާތަނަށް ގާތްގަޑަކަށް 200 ވުރެ ގިނަ ތަންތަން ރިޕޯޓްކޮށްފައިވާކަމަށް އިހްސާން ވިދާޅުވިއެވެ.
