ދިވެހި ބަހުގެ އެކަޑަމީން ބޭއްވި އަދަބީ މުބާރާތްތަކާއި، އަތުލިޔުން މުބާރާތުގެ އިނާމު ދިނުމަށް މިރޭ ސޮލާހުއްދީން ސްކޫލުގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައި ރައީސް ޑރ. މުއިއްޒު ވިދާޅުވީ ދިވެހިބަހާއި ސަގާފަތާއި ތަރިކައާއި ތާރީހު ކުދީންނަށް އުނގަންނައި ދިނުމުގައި ޒަމާނީ ގޮތްތައް ލިބިގަތުން މުހިއްމު ކަމަށެވެ. އެފަދަ ކަންކަން ހަމައެކަނި ލިޔެފައިވާ ފިލާވަޅުތަކަކަށް ހަނިކުރެވިފައި އޮތުން ރަނގަޅު ނޫން ކަމުގައިވެސް ވިދާޅުވި އެވެ.
އެމަނިކުފާނު ވިދާޅުވީ ރާއްޖޭގައި ކުޑަކުދީން ބަލާނެ ކާޓޫނު ފިލްމާއި ގައުމީ އެކި ހާދިސާތަކުގެ ފިލްމު ނެތުމަކީ ބައެއް މީހުން ކަންބޮޑުވުމެއްގެ ގޮތުގައި ފާހަގަކުރާ ކަމެއް ކަމަށެވެ. ވަކިން ހާއްސަކޮށް ރާއްޖޭން ބޭރުގައި އުޅޭ ދިވެހި އާއިލާތަކާއި ރާއްޖޭގައިވެސް ބެލެނިވެރީން އޮފީހުގައި ގިނަ ވަގުތު ހޭދަކުރަން ޖެހޭ ހާލަތްތަކުގައި ކުޑަކުދިންނަށް ފައިދާހުރި ވަގުތުތަކަށް އެ ވަގުތުތައް ބަދަލުކޮށްލަން ބެލެނިވެރީން ބޭނުންވާ ކަމަށެވެ.
އެކަމަކު އެފަދަ ވަގުތަކުގައިވެސް ކުޑަކުއްޖަކަށް ދައްކާލެވޭނެ ވީޑިއޯ ނުވަތަ ގޭމް ފަދަ ދިވެހިވަންތަ ތަކެތި ނެތްކަމުގެ ކަންބޮޑުވުން ވަރަށް ގިނަ ބެލެނިވެރީން ފާޅުކުރައްވާ ކަމަށްވެސް ވިދާޅުވި އެވެ. އެހެންވެ ބޭނުންފުޅުވަނީ މި ބޮޑު ގައުމީ އުދާސްތަކަށް ހައްލެއް ގެންނަވަން ކަމުގައިވެސް ވިދާޅުވި އެވެ.
އަދާބީ މުބާރާތްތަކުގައި ބައިވެރިވި ކުދިންނާ މުހާތަބުކުރައްވާ ރައީސް ވިދާޅުވީ އެ ކުދީންގެ ކިބައިގައިވާ ހުނަރަކީ ވަރަށް ބޮޑު އަމާނާތެއް އަދި އެހާމެ މަތިވެރި ނިއުމަތެއް ކަމަށްވާތީ އެކަމަށްޓަކައި ﷲއަށް ޙަމްދުކުރުމާއެކު، ވަރަށް ޒިންމާދާރުކަމާއެކީ އެ ހުނަރުތައް ބޭނުންކުރަންވާނެ ކަމަށެވެ. އެހެންވީމާ ކޮންމެ ކުއްޖަކުވެސް އެކުއްޖަކަށް ލިބިފައިވާ އަދަބީ ގާބިލްކަން އަބަދުވެސް ދިވެހި ގައުމާ އެއްކޮޅަށް ބޭނުންކުރަން ރައީސް ވަނީ ގޮވާލައްވާފަ އެވެ.
ރައީސް ވިދާޅުވީ އެމަނިކުފާނު ގަބޫލުފުކުރައްވާ ގޮތުގައި، ދިވެހި ތާނައަކީ ދިވެހީންގެ ފަހުރެކެވެ. ދިވެހީންގެ އަމިއްލަ މާދަރީ ބަހެއް އޮންނަ ފަދައިން ދިވެހީންގެ އަމިއްލަ އަކުރެއް އޮތުމަކީ އެއީ ވަރަށް ބޮޑު ޝަރަފެކެވެ. އަދި ގައުމެއްގެ ނިސްބަތުން ބަލާއިރު، އަމިއްލަ އަކުރެއް އޮތުމަކީ އެ ގައުމެއްގެ ސަގާފީ ސިޔާދަތު އެތައް ގުނަޔަކަށް މަތިވެގެންދާ ކަމެއް ކަމަށް ރައީސް ވިދާޅުވި އެވެ.
އެ ސަބަބަށްޓަކާ އަންނަ އަހަރުން ފެށިގެން ދިވެހި ތާނައިގެ އަތުލިޔުމުގެ މުބާރާތަކީ ގައުމީ ފެންވަރުގައި ވަޒަންކުރެވޭ، ގައުމީ މުބާރާތެއްގެ ގޮތުގައި ކުރިޔަށް ގެންދަން ކަނޑައަޅުއްވާފައިވާ ކަމަށް ވެސް ރައީސް ވިދާޅުވި އެވެ.
