ފުލުހުން މައުލޫމާތު ދިން ގޮތުގައި މިއީ މި މަހުގެ 17 ވަނަ ދުވަހު ހުޅުމާލޭ ގެއެއްގެ ގްރައުންޑް ފްލޯގައި ބަހައްޓާފައި ހުއްޓައި ވަގަށް ނަގާފައިވާ 40 ހޯސްޕަވަރުގެ އައުޓްބޯޑް އިންޖީނެކެވެ.
މި މައްސަލައާ ގުޅިގެން ހުޅުމާލެ ޕޮލިހުން ކުރި މަސައްކަތުން، އެ އިންޖީނު ފެނިފައިވަނީ މި މަހުގެ 18 ވަނަ ދުވަހު ހުޅުމާލޭގައި ހިންގާ ބާ ދަގަނޑު ކިރާ ތަނަކުންނެވެ. އެ ތަން ބަލައިފާސްކުރިއިރު އިންޖީނުގެ ބައިތައް ފެނިފައިވާއިރު، 140،000 ރުފިޔާގެ އަގުހުރި މި އިންޖީނު އެތަނަށް ވިއްކާލާފައިވަނީ އެންމެ 1083 ރުފިޔާއަށް ކަމަށް ފުލުހުން ބުންޏެވެ. އިންޖީނު ހޯދިިއިރު އޭގެ ބައެއް ބައިތައް ވަނީ ވަކިކޮށްފައެވެ.
އިންޖީނު މިހާރު ވެރިފަރާތާ ހަވާލުކޮށްފައިވާއިރު، މި މައްސަލައިގައި އަދި މީހަކު ހައްޔަރުކޮށްފައެއް ނުވެއެވެ. ފުލުހުން ވަނީ މިފަދަ އަގުބޮޑު ތަކެތި ނުއަގުގައި ވިއްކަން އުޅޭނަމަ، އެ ތަކެތި ގަތުމުގެ ކުރިން އެއީ ކިހިނެއް ހޯދާފައިވާ އެއްޗެއްކަން ކަށަވަރުކުރުމަށް އިލްތިމާސްކޮށްފައެވެ. އަދި ވަގަށް ނަގާފައިވާ ތަކެތިކަން އެނގިހުރެ ނުވަތަ އެކަން ބެލުމެއް ނެތި މުއާމަލާތްކުރާ ފަރާތްތަކާ މެދު ގާނޫނީ ފިޔަވަޅު އަޅާނެކަން ފުލުހުން ފާހަގަކުރިއެވެ.
